maani ki talash mein marte lafz

sehan meñ phailī hai

talḳh-tar raat kī raanī kī mahak

kamra-hairat meñ

ḳhvāb kī shahzādī

baal bikhrā.e mire siine par

kab se ik ḳhvāb-e-abad meñ gum hai

lams kī āñkhoñ meñ

qaus-dar-qaus tilismāt ajab zinda haiñ

jhaḌ chukā hai lekin

jism kī shāḳh se chehre kā phuul

ziist ke jauhaḌ meñ

ḳhvāhish-e-dariyā ke

ek amr lamhe ko

sochne kī ye sazā kuchh kam hai

ki jalī harfoñ meñ

likh chukā hai koī

tīra-o-tār azal ke kisī pas-e-manzar meñ

jashn-e-nauroz pe māmūl kī ik maut

hamārī ḳhātir

sehan mein phaili hai

talKH-tar raat ki rani ki mahak

kamra-hairat mein

KHwab ki shahzadi

baal bikhrae mere sine par

kab se ek KHwab-e-abad mein gum hai

lams ki aankhon mein

qaus-dar-qaus tilismat ajab zinda hain

jhaD chuka hai lekin

jism ki shaKH se chehre ka phul

zist ke jauhaD mein

KHwahish-e-dariya ke

ek amr lamhe ko

sochne ki ye saza kuchh kam hai

ki jali harfon mein

likh chuka hai koi

tira-o-tar azal ke kisi pas-e-manzar mein

jashn-e-nauroz pe mamul ki ek maut

hamari KHatir