madar-e-hind

rū-kash-e-charḳh yahī gosha-e-dakan hai yahī

chashm-e-aġhyār meñ ā.īna-e-hairat hai yahī

mehrbānī pe hai vo qibla-e-hājāt bahut

us ne phailā.e haiñ qudrat ke 'atiyyāt bahut

zar luTāne ko kalī gul kī nikaltī hai yahāñ

hai ye mash.hūr zamīñ sonā ugaltī hai yahāñ

ḳhush farishte bhī haiñ zarroñ kā tamāshā kar ke

pheñk dete haiñ yahāñ chāñd ko chūrā kar ke

zāhirī āñkhoñ meñ pinhāñ haiñ balā ke jalve

pattharoñ meñ nazar aate haiñ ḳhudā ke jalve

saaz kā lutf hai har saañs meñ sunte haiñ rabāb

dil ke paimānoñ meñ miltī hai haqīqat kī sharāb

na sharāfat kī kamī aur na daulat kī kamī

hai sapūtoñ meñ magar maañ kī mohabbat kī kamī

bādal adbār ke haiñ un ke saroñ par chhā.e

marnā aa.e na unheñ aur na jiinā aa.e

tang-dastī bhī hai faaqe bhī haiñ bekārī bhī

aur amrāz bhī haiñ aql kī bīmārī bhī

girte jaate haiñ sañbhalne kī koī aas nahīñ

go safar duur kā darpesh hai kuchh paas nahīñ

ek hangāme pe mauqūf na paikār kareñ

ab zarūrat hai ki har kaam meñ īsār kareñ

ru-kash-e-charKH yahi gosha-e-dakan hai yahi

chashm-e-aghyar mein aaina-e-hairat hai yahi

mehrbani pe hai wo qibla-e-hajat bahut

us ne phailae hain qudrat ke 'atiyyat bahut

zar luTane ko kali gul ki nikalti hai yahan

hai ye mashhur zamin sona ugalti hai yahan

KHush farishte bhi hain zarron ka tamasha kar ke

phenk dete hain yahan chand ko chura kar ke

zahiri aankhon mein pinhan hain bala ke jalwe

pattharon mein nazar aate hain KHuda ke jalwe

saz ka lutf hai har sans mein sunte hain rabab

dil ke paimanon mein milti hai haqiqat ki sharab

na sharafat ki kami aur na daulat ki kami

hai saputon mein magar man ki mohabbat ki kami

baadal adbar ke hain un ke saron par chhae

marna aae na unhen aur na jina aae

tang-dasti bhi hai faqe bhi hain bekari bhi

aur amraaz bhi hain aql ki bimari bhi

girte jate hain sanbhalne ki koi aas nahin

go safar dur ka darpesh hai kuchh pas nahin

ek hangame pe mauquf na paikar karen

ab zarurat hai ki har kaam mein isar karen