mal-road se guzarte hue ek nazm

us raste par do jismoñ kā ik saaya thaa!

aur do rūhoñ kā ik maslak!

guuñj rahā thā us raste par harf kā pahlā sannāTā

dhaḌkan kī tasbīh musalsal ism anokhe paḌhtī thī

rusvā.ī kī shoḳh havā.eñ bebākī se raqsāñ thiiñ

us raste par gahre bādal dhuup kiran se laḌte the

ḳhvāb ke panchhī an-jānī samtoñ meñ uḌāneñ bharte the!

phūloñ ne ḳhushbū kā mantar phūñk diyā thā sīnoñ par!

us raste par tum the (shāyad ḳhud se nā-vāqif)

us raste par maiñ thii! aur maiñ tum meñ shāmil thī

zād-e-safar meñ ek thakan thii, ek dukhan aur ek yaqīñ!!

har qalb sarā.e hotā hai aur ne hī guzargah har rasta

kuchh rastoñ se lauT bhī jā.eñ, duur nahīñ jā sakte ham

kuchh manzar ban jaate haiñ nādīda hissa āñkhoñ kā

kuchh lamhoñ kī qaid hamesha dil ko kāTnī paḌtī hai

us raste par do jismon ka ek saya tha!

aur do ruhon ka ek maslak!

gunj raha tha us raste par harf ka pahla sannaTa

dhaDkan ki tasbih musalsal ism anokhe paDhti thi

ruswai ki shoKH hawaen bebaki se raqsan thin

us raste par gahre baadal dhup kiran se laDte the

KHwab ke panchhi an-jaani samton mein uDanen bharte the!

phulon ne KHushbu ka mantar phunk diya tha sinon par!

us raste par tum the (shayad KHud se na-waqif)

us raste par main thi! aur main tum mein shamil thi

zad-e-safar mein ek thakan thi, ek dukhan aur ek yaqin!!

har qalb sarae hota hai aur ne hi guzargah har rasta

kuchh raston se lauT bhi jaen, dur nahin ja sakte hum

kuchh manzar ban jate hain nadida hissa aankhon ka

kuchh lamhon ki qaid hamesha dil ko kaTni paDti hai