man ki mohabbat

ek āshiq bā-vafā aur ek mahbūba hasīñ

kar rahe haiñ donoñ bāham guftugū-e-dil-nashīñ

kah rahā hai āshiq-e-sādiq ba-sad ranj-o-malāl

maiñ tumhārā ho gayā huuñ chhoḌ kar duniyā-o-dīñ

sar na uTThā aaj tak apnā ye hai shān-e-niyāz

muddatoñ se hai tumhārā āstāñ merī jabīñ

ho ga.e haiñ sab judā allāh rī ye bekasī

koī hamdam hai na koī ġham-gusār-o-ham-nashīñ

phir hamesha ke liye ḳhāmosh ho jā.ūñgā maiñ

aur kuchh din gar yahī be-mehriyāñ mujh se rahīñ

ik nigāh-e-lutf se mahrūm rakkhā hai mujhe

is se baḌh kar aur tauhīn-e-vafā mumkin nahīñ

aaj duniyā meñ nahīñ tum sā sitamgar mast-e-nāz

har irāda ranj-dah har aarzū zulm-āfrīñ

dāstān-e-ranj-o-ġham jab sun chukī vo nāznīñ

naaz se bolī ki ye sab sach hai haañ ai nukta-chīñ

āḳhirī ik imtihāñ hai is se ye sābit karo

ham se baḌh kar koī duniyā meñ tumheñ pyārā nahīñ

apnī maañ kā dil jo tum lāoge siina chiir kar

aa.egā us vaqt ham ko aisī bātoñ kā yaqīñ

ho gayā ḳhāmosh āshiq sun ke ye hukm-e-ajīb

ghar ko pahuñchā muztarib bā-chashm-e-tar andohgīñ

maañ kī ulfat par huī ġhālib mohabbat yaar kī

vo kiyā us ne jo duniyā meñ koī kartā nahīñ

le ke dil aur laash maañ kī chhoḌ kar jab vo chalā

kaañp uThī saarī zamīñ tharrā gayā charḳh-e-barīñ

ittifāqan us ko ghabrāhaT meñ ik Thokar lagī

gir paḌā behosh ho kar āshiq-e-sādiq vahīñ

qalb-e-mādar se taḌap kar ye sadā niklī 'shamīm'

maiñ tire qurbān beTā choT to aa.ī nahīñ

ek aashiq ba-wafa aur ek mahbuba hasin

kar rahe hain donon baham guftugu-e-dil-nashin

kah raha hai aashiq-e-sadiq ba-sad ranj-o-malal

main tumhaara ho gaya hun chhoD kar duniya-o-din

sar na uTTha aaj tak apna ye hai shan-e-niyaz

muddaton se hai tumhaara aastan meri jabin

ho gae hain sab juda allah ri ye bekasi

koi hamdam hai na koi gham-gusar-o-ham-nashin

phir hamesha ke liye KHamosh ho jaunga main

aur kuchh din gar yahi be-mehriyan mujh se rahin

ek nigah-e-lutf se mahrum rakkha hai mujhe

is se baDh kar aur tauhin-e-wafa mumkin nahin

aaj duniya mein nahin tum sa sitamgar mast-e-naz

har irada ranj-dah har aarzu zulm-afrin

dastan-e-ranj-o-gham jab sun chuki wo naznin

naz se boli ki ye sab sach hai han ai nukta-chin

aaKHiri ek imtihan hai is se ye sabit karo

hum se baDh kar koi duniya mein tumhein pyara nahin

apni man ka dil jo tum laoge sina chir kar

aaega us waqt hum ko aisi baaton ka yaqin

ho gaya KHamosh aashiq sun ke ye hukm-e-ajib

ghar ko pahuncha muztarib ba-chashm-e-tar andohgin

man ki ulfat par hui ghaalib mohabbat yar ki

wo kiya us ne jo duniya mein koi karta nahin

le ke dil aur lash man ki chhoD kar jab wo chala

kanp uThi sari zamin tharra gaya charKH-e-barin

ittifaqan us ko ghabrahaT mein ek Thokar lagi

gir paDa behosh ho kar aashiq-e-sadiq wahin

qalb-e-madar se taDap kar ye sada nikli 'shamim'

main tere qurban beTa choT to aai nahin