man

zindagī ik dhuup hai aur tū mirī chhāñv hai maañ

kulfatoñ kī shab meñ sham' hai to bas terī du'ā

maiñ to so jaatī huuñ gahrī niiñd meñ ārām se

nīm-shab meñ jā ke sajde meñ tū jab kartī du'ā

zindagī kā jo hunar sīkhā hai ham ne aaj tak

kaam merā kuchh nahīñ hai bas ye sab terī 'atā

bhāñp letī hai havā kā ruḳh tū kitnī duur se

vaqt-e-mushkil hai mirā hotī hai tū dil-āshnā

aaj tak koī samajh paayā nahīñ is raaz ko

haal bachchoñ ke diloñ kā hai tujhe kyūñkar pata

hai du'ā 'nāhīd' bas itnī sī maañ kī shaan meñ

ho sadā sāya-fagan āñchal tirā shafqat-bharā

zindagi ek dhup hai aur tu meri chhanw hai man

kulfaton ki shab mein sham' hai to bas teri du'a

main to so jati hun gahri nind mein aaram se

nim-shab mein ja ke sajde mein tu jab karti du'a

zindagi ka jo hunar sikha hai hum ne aaj tak

kaam mera kuchh nahin hai bas ye sab teri 'ata

bhanp leti hai hawa ka ruKH tu kitni dur se

waqt-e-mushkil hai mera hoti hai tu dil-ashna

aaj tak koi samajh paya nahin is raaz ko

haal bachchon ke dilon ka hai tujhe kyunkar pata

hai du'a 'nahid' bas itni si man ki shan mein

ho sada saya-fagan aanchal tera shafqat-bhara