ماں

زندگی اک دھوپ ہے اور تو مری چھاؤں ہے ماں

کلفتوں کی شب میں شمع ہے تو بس تیری دعا

میں تو سو جاتی ہوں گہری نیند میں آرام سے

نیم شب میں جا کے سجدے میں تو جب کرتی دعا

زندگی کا جو ہنر سیکھا ہے ہم نے آج تک

کام میرا کچھ نہیں ہے بس یہ سب تیری عطا

بھانپ لیتی ہے ہوا کا رخ تو کتنی دور سے

وقت مشکل ہے مرا ہوتی ہے تو دل آشنا

آج تک کوئی سمجھ پایا نہیں اس راز کو

حال بچوں کے دلوں کا ہے تجھے کیوں کر پتہ

ہے دعا ناہیدؔ بس اتنی سی ماں کی شان میں

ہو سدا سایہ فگن آنچل ترا شفقت بھرا