mara

husn kī āb-o-tāb ne maarā

be-gunah is savāb ne maarā

haa.e afsos is buḌhāpe meñ

tere kāfir shabāb ne maarā

dil phañsā hai ajiib uljhan meñ

zulf ke pech-o-tāb ne maarā

vaise merā savāl sīdhā thā

tere ulTe javāb ne maarā

us ne hī mujh ko intiḳhāb kiyā

nigah-e-intiḳhāb ne maarā

ittifāqan jo ho ga.ī ulfat

nā-gahānī azaab ne maarā

vo javāboñ pe de rahe haiñ javāb

is javāb-ul-javāb ne maarā

jang aur jang bhī girānī kī

is double inqalāb ne maarā

peT meñ aañt aur na muñh meñ daañt

phir bhī zālim ḳhizāb ne maarā

ab junūñ kī ho kis tarah takmīl

nā-mukammal shabāb ne maarā

ishq bechārgī ke haal meñ hai

husn ke ro.ab-o-dāb ne maarā

rang kaalā hai gul-badan hai magar

aise kaale gulāb ne maarā

tū hī kah kyoñ na merā dam ghuTtā

tere bejā hijāb ne maarā

zindagī talḳh ho ga.ī hai 'zarīf'

is jahān-e-ḳharāb ne maarā

husn ki aab-o-tab ne mara

be-gunah is sawab ne mara

hae afsos is buDhape mein

tere kafir shabab ne mara

dil phansa hai ajib uljhan mein

zulf ke pech-o-tab ne mara

waise mera sawal sidha tha

tere ulTe jawab ne mara

us ne hi mujh ko intiKHab kiya

nigah-e-intiKHab ne mara

ittifaqan jo ho gai ulfat

na-gahani azab ne mara

wo jawabon pe de rahe hain jawab

is jawab-ul-jawab ne mara

jang aur jang bhi girani ki

is double inqalab ne mara

peT mein aant aur na munh mein dant

phir bhi zalim KHizab ne mara

ab junun ki ho kis tarah takmil

na-mukammal shabab ne mara

ishq bechaargi ke haal mein hai

husn ke roab-o-dab ne mara

rang kala hai gul-badan hai magar

aise kale gulab ne mara

tu hi kah kyon na mera dam ghuTta

tere beja hijab ne mara

zindagi talKH ho gai hai 'zarif'

is jahan-e-KHarab ne mara