مارا

حسن کی آب و تاب نے مارا

بے گنہ اس ثواب نے مارا

ہائے افسوس اس بڑھاپے میں

تیرے کافر شباب نے مارا

دل پھنسا ہے عجیب الجھن میں

زلف کے پیچ و تاب نے مارا

ویسے میرا سوال سیدھا تھا

تیرے الٹے جواب نے مارا

اس نے ہی مجھ کو انتخاب کیا

نگہ انتخاب نے مارا

اتفاقاً جو ہو گئی الفت

ناگہانی عذاب نے مارا

وہ جوابوں پہ دے رہے ہیں جواب

اس جواب الجواب نے مارا

جنگ اور جنگ بھی گرانی کی

اس ڈبل انقلاب نے مارا

پیٹ میں آنت اور نہ منہ میں دانت

پھر بھی ظالم خضاب نے مارا

اب جنوں کی ہو کس طرح تکمیل

نامکمل شباب نے مارا

عشق بے چارگی کے حال میں ہے

حسن کے رعب و داب نے مارا

رنگ کالا ہے گل بدن ہے مگر

ایسے کالے گلاب نے مارا

تو ہی کہہ کیوں نہ میرا دم گھٹتا

تیرے بے جا حجاب نے مارا

زندگی تلخ ہو گئی ہے ظریفؔ

اس جہان خراب نے مارا