masumiyat

hamāre yahāñ bachche ko

jo abhī puurī tarah khaḌā honā bhī na sīkhā ho

pistol haath meñ de dī jaatī hai

do chaar baar use zamīn par girā kar

use pistol sambhālnā

aur phir haat ko zarā sī jumbish se

use uñgliyoñ ke darmiyān

phir kī kī tarah bhī aa jaatā hai

laḌakpan phalāñgne se pahle

use do ek aadmī girānā hote haiñ

baḌe hone par us ke hāthoñ meñ

aslī bandūq

yā machine-gun thamā dī jaatī hai

ab us se tavaqqo kī jaatī hai

ki vo do ek afrād ko girāne par iktifā nahīñ karegā

balki ka.ī insānoñ ke ḳhuun se

apne haath rañgegā

mujhe e'tirāf hai

hamāre yahāñ

sab log aisā nahīñ kar paate

kuchh to khilaunā pistol hī se

apnī nā-puḳhta umr meñ

ḳhud ko halāk kar lete haiñ

kuchh aise bhī haiñ

jo sach-much kī pistol ko bhī

khilaunā hī samajhte haiñ

is liye unheñ

is liye licence ki zarūrat bhī mahsūs nahīñ hotī

jinheñ vo halāk karte haiñ

aksar un meñ us ke qarībī dost

yā azīz-o-aqārib hote haiñ

unheñ halāk karne ke baad

ye dekh kar vo hairān rah jaate haiñ

ki un ke hāthoñ meñ

sach-much kī pistol aa kaise ga.ī

aur vo kab se

kisī ke nishāne par the

hamare yahan bachche ko

jo abhi puri tarah khaDa hona bhi na sikha ho

pistol hath mein de di jati hai

do chaar bar use zamin par gira kar

use pistol sambhaalna

aur phir hat ko zara si jumbish se

use ungliyon ke darmiyan

phir ki ki tarah bhi aa jata hai

laDakpan phalangne se pahle

use do ek aadmi girana hote hain

baDe hone par us ke hathon mein

asli banduq

ya machine-gun thama di jati hai

ab us se tawaqqo ki jati hai

ki wo do ek afrad ko girane par iktifa nahin karega

balki kai insanon ke KHun se

apne hath rangega

mujhe e'tiraf hai

hamare yahan

sab log aisa nahin kar pate

kuchh to khilauna pistol hi se

apni na-puKHta umr mein

KHud ko halak kar lete hain

kuchh aise bhi hain

jo sach-much ki pistol ko bhi

khilauna hi samajhte hain

is liye unhen

is liye licence ki zarurat bhi mahsus nahin hoti

jinhen wo halak karte hain

aksar un mein us ke qaribi dost

ya aziz-o-aqarib hote hain

unhen halak karne ke baad

ye dekh kar wo hairan rah jate hain

ki un ke hathon mein

sach-much ki pistol aa kaise gai

aur wo kab se

kisi ke nishane par the