mazarat

merī āñkheñ haiñ ki vīrān sā marqad koī

kisī sahrā meñ koī samt-numā ho jaise

sard rātoñ kā koī chāñd thakan se mad.hosh

raat ke pichhle pahar nauha-sarā ho jaise

merī āñkheñ haiñ ki ik ḳhvāhish-e-be-rang liye

jaane kis daur ke manzar kī talab meñ ġhaltāñ

be-sabab rāh-navardī kā ishāra de kar

mere sapne mirī palkoñ se bhī mastūr kareñ

mujh ko ehsās hai hamdam ki baḌī chāhat se

tū chalī aa.ī rivāyāt ke kāñTe chun kar

naqsh-e-pā raah meñ botā gayā zaḳhmoñ ke gulāb

mujh ko ma.alūm hai ai dost mirī jaan mirī

tū ne ehsās ke tāroñ se ka.ī ḳhvāb bune

mere pairoñ se rivājoñ ke nokīle kāñTe

phuul samjhe kabhī chūme kabhī palkoñ se chune

maiñ ki har baar baġhāvat kī alāmat Thahrā

ab ke yuuñ hai ki tire qurb ke mausam ke evaz

ātish-e-vaqt meñ īñdhan kī tarah jalte hue

nā-tavāñ jism pe ik zaḳhm lagā hai gahrā

meri aankhen hain ki viran sa marqad koi

kisi sahra mein koi samt-numa ho jaise

sard raaton ka koi chand thakan se madhosh

raat ke pichhle pahar nauha-sara ho jaise

meri aankhen hain ki ek KHwahish-e-be-rang liye

jaane kis daur ke manzar ki talab mein ghaltan

be-sabab rah-nawardi ka ishaara de kar

mere sapne meri palkon se bhi mastur karen

mujh ko ehsas hai hamdam ki baDi chahat se

tu chali aai riwayat ke kanTe chun kar

naqsh-e-pa rah mein bota gaya zaKHmon ke gulab

mujh ko malum hai ai dost meri jaan meri

tu ne ehsas ke taron se kai KHwab bune

mere pairon se riwajon ke nokile kanTe

phul samjhe kabhi chume kabhi palkon se chune

main ki har bar baghawat ki alamat Thahra

ab ke yun hai ki tere qurb ke mausam ke ewaz

aatish-e-waqt mein indhan ki tarah jalte hue

na-tawan jism pe ek zaKHm laga hai gahra