mazi mein rah jaane wali aankhen

ham sab kī yādoñ meñ hai ik sabz-darīcha

jis meñ rakkhā hai gul-dān

is gul-dān meñ ab tak taaza phuul saje haiñ

phūloñ meñ do āñkheñ haiñ

jo maazī kī tārīk guzargāhoñ meñ

jaise sham.eñ ban kar raushan haiñ

un āñkhoñ aur ham logoñ meñ

ab vaqt kā sahrā haa.il hai

duur haiñ lekin ye āñkheñ har lamha dekhtī rahtī haiñ

ham kaise haiñ kis des meñ haiñ

kis bhes meñ haiñ kin logoñ meñ haiñ

kaun hameñ ḳhushiyāñ detā hai kaun hameñ ġham detā hai

un se bichhaḌ ke kis se mile

aur kis se hue ham log judā

dukh meñ aur tanhā.ī meñ vo kaun thā jis ko yaad kiyā

ham ro.eñ to aaj bhī jaise ye āñkheñ ro detī haiñ

ham ḳhush hoñ to ye bhī ḳhush ho jaatī haiñ

in āñkhoñ kā hameñ sahārā rahtā hai

jaise musāfir dasht meñ ho

to us kā sāthī us par raushan ek sitāra rahtā hai

lekin ham logoñ ke dil ye soch ke akasr kaañp uThte haiñ

jab ye āñkheñ bujh jā.eñgī

sabz-darīcha ho jā.egā band to āḳhir kyā hogā

hum sab ki yaadon mein hai ek sabz-daricha

jis mein rakkha hai gul-dan

is gul-dan mein ab tak taza phul saje hain

phulon mein do aankhen hain

jo mazi ki tarik guzargahon mein

jaise shamen ban kar raushan hain

un aankhon aur hum logon mein

ab waqt ka sahra hail hai

dur hain lekin ye aankhen har lamha dekhti rahti hain

hum kaise hain kis des mein hain

kis bhes mein hain kin logon mein hain

kaun hamein KHushiyan deta hai kaun hamein gham deta hai

un se bichhaD ke kis se mile

aur kis se hue hum log juda

dukh mein aur tanhai mein wo kaun tha jis ko yaad kiya

hum roen to aaj bhi jaise ye aankhen ro deti hain

hum KHush hon to ye bhi KHush ho jati hain

in aankhon ka hamein sahaara rahta hai

jaise musafir dasht mein ho

to us ka sathi us par raushan ek sitara rahta hai

lekin hum logon ke dil ye soch ke akasr kanp uThte hain

jab ye aankhen bujh jaengi

sabz-daricha ho jaega band to aaKHir kya hoga