ماضی سے ایک سوال

میں سوچتا ہوں کہ اپنے ماضی سے

ایک دن یہ سوال پوچھوں

کہاں گئیں وہ حکایتیں سب

کہاں گئے میرے خواب سارے

کہاں گئے وہ حسین لمحے

وہ زیست کے دل نشیں سہارے

کہ اب تو بس

دو نحیف کاندھوں کو

دونوں جانب سے کھینچتی ہوئی طنابیں

رقیق سطریں سپاٹ صفحے

بوریت سے بھری کتابیں

نہ شاہراہوں پہ کوئی ہلچل

نہ دل میں ارماں نہ سر میں سودا

نہ کوئی خوشبو حیات آگیں

نہ رنگ کوئی امید افزا

نہ بے توازن دلوں کی دھڑکن

نہ چاندنی میں کوئی چبھن سی

نہ آگ برساتا کوئی ساون

میں سوچتا ہوں کہ اپنے ماضی سے

ایک دن یہ سوال پوچھوں

کہ موت آئی تھی کب اسے

اور کہاں ہے مرے جنون کا مدفن