mazi se ek sawal

maiñ sochtā huuñ ki apne maazī se

ek din ye savāl pūchhūñ

kahāñ ga.iiñ vo hikāyateñ sab

kahāñ ga.e mere ḳhvāb saare

kahāñ ga.e vo hasīn lamhe

vo ziist ke dil-nashīñ sahāre

ki ab to bas

do nahīf kāñdhoñ ko

donoñ jānib se khīñchtī huī tanābeñ

raqīq satreñ sapāT safhe

boriyat se bharī kitābeñ

na shāh-rāhoñ pe koī halchal

na dil meñ armāñ na sar meñ saudā

na koī ḳhushbū hayāt-āgīñ

na rang koī umīd-afzā

na be-tavāzun diloñ kī dhaḌkan

na chāñdnī meñ koī chubhan sī

na aag barsātā koī sāvan

maiñ sochtā huuñ ki apne maazī se

ek din ye savāl pūchhūñ

ki maut aa.ī thī kab use

aur kahāñ hai mire junūn kā madfan

main sochta hun ki apne mazi se

ek din ye sawal puchhun

kahan gain wo hikayaten sab

kahan gae mere KHwab sare

kahan gae wo hasin lamhe

wo zist ke dil-nashin sahaare

ki ab to bas

do nahif kandhon ko

donon jaanib se khinchti hui tanaben

raqiq satren sapaT safhe

boriyat se bhari kitaben

na shah-rahon pe koi halchal

na dil mein arman na sar mein sauda

na koi KHushbu hayat-agin

na rang koi umid-afza

na be-tawazun dilon ki dhaDkan

na chandni mein koi chubhan si

na aag barsata koi sawan

main sochta hun ki apne mazi se

ek din ye sawal puchhun

ki maut aai thi kab use

aur kahan hai mere junun ka madfan