mabaada

baḌī hairān-kun hai

haqīqat ḳhvāb hai yā ḳhvāb se aage kī manzil

ye duniyā ḳhvāb kī duniyā pe sabqat le ga.ī hai

fasānoñ se fuzūñ-tar zindagī hai

gumāñ kī sarhadeñ hoñ yā taḳhayyul kī uḌāneñ

ḳhirad kī jast se pīchhe kahīñ pīchhe dikhā.ī de rahī haiñ

ḳhirad kī dastaras meñ kyā nahīñ hai

nahīñ hai ġhair-mumkin

kabhī imkān se jo māvarā thā

faqat ik dāstāñ hai

ga.e vaqtoñ meñ jo raa.ij asātīrī ḳhudā thā

dar-e-ījād kī chaukhaT pe hairat surañgoñ hai

ye sab idrāk kā dast-e-junūñ hai

pas-e-idrāk jalva-āfrīñ hai aql kī jādū-nigāhī

shu.ūr-e-asr-e-hāzir meñ simaTtī hai ḳhudā.ī

samā.at kā ye aalam hai jo gum-gashta sadā.eñ thī sunā.ī de rahī haiñ

basārat us balā kī hai ki zarre meñ bhī duniyā.eñ dikhā.ī de rahī haiñ

jahān-e-āgahī ke rāstoñ par chalte chalte

sitāroñ ko sar-e-imkāñ talak ab lā chuke haiñ

na.ī duniyāoñ ke ham bhed kyā kyā pā chuke haiñ

ḳhirad ye chāhtī hai maut ko bhī zer kar de

vajūd-e-hast phailā de qayām zindagī tā-der kar de

ḳhirad kī ye fusūñ-kārī ye itnī tez-raftārī kahāñ jā kar thamegī

kahāñ par ḳhatm hogī

kahānī justujū kī

jahāñ insān kī uglā paḌāv hai vo manzil

vo manzil ajnabī rastoñ kā hāsil

kisī anjān duniyā se mumāsil

mujhe ye ḳhauf khaa.e jā rahā hai

ki apnī zaat apne aap se ham

kahīñ nikleñ to itnī duur jā pahuñcheñ jahāñ se vāpsī mumkin nahīñ ho

baDi hairan-kun hai

haqiqat KHwab hai ya KHwab se aage ki manzil

ye duniya KHwab ki duniya pe sabqat le gai hai

fasanon se fuzun-tar zindagi hai

guman ki sarhaden hon ya taKHayyul ki uDanen

KHirad ki jast se pichhe kahin pichhe dikhai de rahi hain

KHirad ki dastaras mein kya nahin hai

nahin hai ghair-mumkin

kabhi imkan se jo mawara tha

faqat ek dastan hai

gae waqton mein jo raij asatiri KHuda tha

dar-e-ijad ki chaukhaT pe hairat surangon hai

ye sab idrak ka dast-e-junun hai

pas-e-idrak jalwa-afrin hai aql ki jadu-nigahi

shuur-e-asr-e-hazir mein simaTti hai KHudai

samaat ka ye aalam hai jo gum-gashta sadaen thi sunai de rahi hain

basarat us bala ki hai ki zarre mein bhi duniyaen dikhai de rahi hain

jahan-e-agahi ke raston par chalte chalte

sitaron ko sar-e-imkan talak ab la chuke hain

nai duniyaon ke hum bhed kya kya pa chuke hain

KHirad ye chahti hai maut ko bhi zer kar de

wajud-e-hast phaila de qayam zindagi ta-der kar de

KHirad ki ye fusun-kari ye itni tez-raftari kahan ja kar thamegi

kahan par KHatm hogi

kahani justuju ki

jahan insan ki ugla paDaw hai wo manzil

wo manzil ajnabi raston ka hasil

kisi anjaan duniya se mumasil

mujhe ye KHauf khae ja raha hai

ki apni zat apne aap se hum

kahin niklen to itni dur ja pahunchen jahan se wapsi mumkin nahin ho