machchhar aur machchraniyan

TuuTī phūTī morī meñ ik machchhar sāhab rahte haiñ

shāyad vo ghar meñ bhī apne machchhar hī kahlāte haiñ

bīviyāñ un kī chaar adad haiñ machchrānī kahlātī haiñ

morī vaale ghar meñ hī jī chāroñ se bahlāte haiñ

ik din vo ghar se nikle to vāpas aanā bhuul ga.e

maiñ to jānūñ isī tarah se roz kahīñ uḌ jaate haiñ

bīviyāñ un kī chup baiThī thiiñ lekin fikr thī sab ko hī

chāroñ aapas meñ kahtī thiiñ ab aate ab aate haiñ

pahlī bolī sach kahtī huuñ maiñ aadat se vāqif huuñ

aaḌe tirchhe uḌte vo ab biin bajāte aate haiñ

dūsrī bolī sach kahtī huuñ maiñ aadat se vāqif huuñ

laal khaTolā hare bhare takiye un par loT lagāte haiñ

tīsrī bolī sach kahtī huuñ maiñ aadat se vāqif huuñ

kuuḌā ghar ke ḳhamīr ke uupar rah rah kar mañDlāte haiñ

chauthī bolī sach kahtī huuñ maiñ aadat se vāqif huuñ

baasī baasī phaloñ ke ras meñ ḳhush ho ho ke nahāte haiñ

TuTi phuTi mori mein ek machchhar sahab rahte hain

shayad wo ghar mein bhi apne machchhar hi kahlate hain

biwiyan un ki chaar adad hain machchrani kahlati hain

mori wale ghar mein hi ji chaaron se bahlate hain

ek din wo ghar se nikle to wapas aana bhul gae

main to jaanun isi tarah se roz kahin uD jate hain

biwiyan un ki chup baiThi thin lekin fikr thi sab ko hi

chaaron aapas mein kahti thin ab aate ab aate hain

pahli boli sach kahti hun main aadat se waqif hun

aaDe tirchhe uDte wo ab bin bajate aate hain

dusri boli sach kahti hun main aadat se waqif hun

lal khaTola hare bhare takiye un par loT lagate hain

tisri boli sach kahti hun main aadat se waqif hun

kuDa ghar ke KHamir ke upar rah rah kar manDlate hain

chauthi boli sach kahti hun main aadat se waqif hun

basi basi phalon ke ras mein KHush ho ho ke nahate hain