machchhar se jang

sunā.ūñ maiñ apnī shujā.at kā qissa

dilerī kā qissa himāqat kā qissa

masahrī pe leTā jo sone kī ḳhātir

huā ek machchhar mire paas hāzir

mujhe filmī gaane sunāne lagā vo

mirī niiñd gā kar uḌāne lagā vo

kahā maiñ ne machchhar miyāñ rahne do bas

kahīñ aur gaao mujhe sone do bas

ye sun kar vo itnā huā garm mujh par

ki fauran hī chehre pe aayā jhapaT kar

mire gaal pe us ne zoroñ se kaaTā

ki taklīf se maiñ bahut tilmilāyā

do-hatthaḌ jo machchhar ke ġhussa se maarā

pakaḌ kar mire pair vo phir pukārā

nahīñ mārnā itnā āsān mujh ko

tirā ḳhuun pī kar hī chhoḌūñgā tujh ko

ye kah kar mire paañv par kaaT khāyā

maiñ ik baar phir dard se tilmilāyā

ka.ī haath maare magar vaare machchhar

lagā hañsne kamre kā chakkar lagā kar

ġhurūr us kā mujh se na dekhā gayā jab

mirā ġhussa had se sivā ho gayā jab

to maiñ ne bhī chupke se hokey uThā kar

nazar apnī machchhar kī jānib uThā kar

ghumā kar zarā maiñ ne hokey jo maarī

huī jaan machchhar kī allāh ko pyārī

sunaun main apni shujaat ka qissa

dileri ka qissa himaqat ka qissa

masahri pe leTa jo sone ki KHatir

hua ek machchhar mere pas hazir

mujhe filmi gane sunane laga wo

meri nind ga kar uDane laga wo

kaha main ne machchhar miyan rahne do bas

kahin aur gao mujhe sone do bas

ye sun kar wo itna hua garm mujh par

ki fauran hi chehre pe aaya jhapaT kar

mere gal pe us ne zoron se kaTa

ki taklif se main bahut tilmilaya

do-hatthaD jo machchhar ke ghussa se mara

pakaD kar mere pair wo phir pukara

nahin marna itna aasan mujh ko

tera KHun pi kar hi chhoDunga tujh ko

ye kah kar mere panw par kaT khaya

main ek bar phir dard se tilmilaya

kai hath mare magar ware machchhar

laga hansne kamre ka chakkar laga kar

ghurur us ka mujh se na dekha gaya jab

mera ghussa had se siwa ho gaya jab

to main ne bhi chupke se hokey uTha kar

nazar apni machchhar ki jaanib uTha kar

ghuma kar zara main ne hokey jo mari

hui jaan machchhar ki allah ko pyari