مداری لوٹ آیا

مداری ناچتا ہے

کہ اس کی ڈگڈگی کی لے مدھر ہے

وہ ہیملن شہر کا جادوگر نہیں

مگر معلوم ہے اس کو

کہ اس کے شہر میں

کہیں چوہے نہیں بندر بھرے ہیں

پرانی بانسری کی دھن

انہیں اچھی نہیں لگتی

سو اس کی ڈگڈگی پر

نکل آتے ہیں جھنڈوں میں

شرارت ان کی فطرت ہے

مداری جانتا ہے

شاہانہ فقیری کا لبادہ

اسے ہے خوب بھاتا

عجب انداز میں اپنی

وہ ڈگڈگی کی لے بڑھاتا ہے

بندر ناچتے ہیں جھومتے ہیں جانتے ہیں

وہ انسانوں کی بستی کو

بھلے ویران ہی کر دیں

مداری جب تلک ہے ساتھ ان کے

ندی میں ڈوب مرنے کا کوئی خطرہ نہیں ہے