madari lauT aaya

madārī nāchtā hai

ki us kī DugDugī kī lai madhur hai

vo hamelin shahr kā jādūgar nahīñ

magar ma.alūm hai us ko

ki us ke shahr meñ

kahīñ chūhe nahīñ bandar bhare haiñ

purānī bāñsurī kī dhun

unheñ achchhī nahīñ lagtī

so us kī DugDugī par

nikal aate haiñ jhunḌoñ meñ

sharārat un kī fitrat hai

madārī jāntā hai

shāhāna faqīrī kā labāda

use hai ḳhuub bhātā

ajab andāz meñ apnī

vo DugDugī kī lai baḌhātā hai

bandar nāchte haiñ jhūmte haiñ jānte haiñ

vo insānoñ kī bastī ko

bhale vīrān hī kar deñ

madārī jab talak hai saath un ke

nadī meñ Duub marne kā koī ḳhatra nahīñ hai

madari nachta hai

ki us ki DugDugi ki lai madhur hai

wo hamelin shahr ka jadugar nahin

magar malum hai us ko

ki us ke shahr mein

kahin chuhe nahin bandar bhare hain

purani bansuri ki dhun

unhen achchhi nahin lagti

so us ki DugDugi par

nikal aate hain jhunDon mein

shararat un ki fitrat hai

madari jaanta hai

shahana faqiri ka labaada

use hai KHub bhata

ajab andaz mein apni

wo DugDugi ki lai baDhata hai

bandar nachte hain jhumte hain jaante hain

wo insanon ki basti ko

bhale viran hi kar den

madari jab talak hai sath un ke

nadi mein Dub marne ka koi KHatra nahin hai