madd-o-jazr

shām-e-hañgām to ham hai

tasavvur ke khaToloñ pe sajī

apne ajdād ke ayyām kī

tasvīreñ damak uThī haiñ

aise lagtā hai ki

zarroñ se nikalte the qamar

zindagī raqs-kunāñ

nāzāñ-o-shādāb huā kartī thī

naddiyāñ duudh kī bahtī thiiñ

mo.attar thī havā

mahfil-e-hast meñ

har sū the rasīle panghaT

sabz peḌoñ pe khilā karte the naġhmoñ ke gulāb

vahshat-e-ātish-e-auqāt kī illat to kujā

koī darmāndagī ke naam se vāqif bhī na thā

kitne manzar the jinheñ ḳhuld ke manzar kahiye

ruup kī nagrī meñ sañgīt ke sāgar kahiye

aaj chehroñ pe masarrat bhī sarāsīma hai

vahshat-e-ātish-e-auqāt ne

āfāt ke sho.ale pheñke

har taraf maut ke jvālā-mukhī kā laavā

saañs lene se pighal jaate haiñ uḌte panchhī

araz-e-tahzīb ke siine meñ numū-yāfta zahrīle juzām

qaaf gulfām kī ābādī ko le Duube haiñ

vaqt kī god meñ sūkhe bachche

chār-sū ghūmte lāġhar rāñjhe

na.e chañgez na.e nādir-shāh

aahan ho sharbā ke shab-dīz

kāhin maktab-e-naḳhshab ke

fusūñ-kār bagūle haiñ ki

sarsām ke sar chashme haiñ

gūñjte shahpar-e-āseb ke ḳhūnī panje

ādam-e-shā.eq-e-fitrat ke liye

qufl abjad bhī haiñ

zanjīreñ bhī

ruup kī nagrī meñ bahrūp ke tājir aa.e

duur desoñ ke fusūñ-kār

zar kāġhaz rāhat ke liye

chār-sū kushtoñ ke pushte bhī lage haiñ dekho

kis qadar ḳhūn-bahā baaqī hai

āñkheñ pathrā.ī haiñ maaoñ kī

ġhulāmān-e-rusūm-e-amvāj

apnī aqlīm kī me.arāj

kahāñ baiThe haiñ

zarre zarre se nikalte haiñ añdhere bichchhū

nadī nāloñ meñ havāoñ meñ lahu

ḳhuld mashriq meñ lahū

jannat maġhrib meñ lahū

ruup kī nagrī meñ

sañgīt ke sāgar meñ lahū

merī masjid meñ lahū

aap ke mandir meñ lahū

dekhnā ġhaur se ai chāragaro

merī bakal meñ lahū

aap kī chādar meñ lahū

sham-e-hangam to hum hai

tasawwur ke khaTolon pe saji

apne ajdad ke ayyam ki

taswiren damak uThi hain

aise lagta hai ki

zarron se nikalte the qamar

zindagi raqs-kunan

nazan-o-shadab hua karti thi

naddiyan dudh ki bahti thin

moattar thi hawa

mahfil-e-hast mein

har su the rasile panghaT

sabz peDon pe khila karte the naghmon ke gulab

wahshat-e-atish-e-auqat ki illat to kuja

koi darmandagi ke nam se waqif bhi na tha

kitne manzar the jinhen KHuld ke manzar kahiye

rup ki nagri mein sangit ke sagar kahiye

aaj chehron pe masarrat bhi sarasima hai

wahshat-e-atish-e-auqat ne

aafat ke shoale phenke

har taraf maut ke jwala-mukhi ka lawa

sans lene se pighal jate hain uDte panchhi

araz-e-tahzib ke sine mein numu-yafta zahrile juzam

qaf gulfam ki aabaadi ko le Dube hain

waqt ki god mein sukhe bachche

chaar-su ghumte laghar ranjhe

nae changez nae nadir-shah

aahan ho sharba ke shab-diz

kahin maktab-e-naKHshab ke

fusun-kar bagule hain ki

sarsam ke sar chashme hain

gunjte shahpar-e-aseb ke KHuni panje

aadam-e-shaeq-e-fitrat ke liye

qufl abjad bhi hain

zanjiren bhi

rup ki nagri mein bahrup ke tajir aae

dur deson ke fusun-kar

zar kaghaz rahat ke liye

chaar-su kushton ke pushte bhi lage hain dekho

kis qadar KHun-baha baqi hai

aankhen pathrai hain maon ki

ghulaman-e-rusum-e-amwaj

apni aqlim ki mearaj

kahan baiThe hain

zarre zarre se nikalte hain andhere bichchhu

nadi nalon mein hawaon mein lahu

KHuld mashriq mein lahu

jannat maghrib mein lahu

rup ki nagri mein

sangit ke sagar mein lahu

meri masjid mein lahu

aap ke mandir mein lahu

dekhna ghaur se ai chaaragaro

meri bakal mein lahu

aap ki chadar mein lahu