madfan

merā pyaar

us bastī ke naam

jahāñ mire bachpan kī nannhī-munnī yādeñ sotī haiñ

jahāñ mirī ma.asūm tamannāoñ ne gharauñde khīñche the

merā pyaar

us ThanDe gahre nīlam tālāb ke naam

jis kī ujlī miTTī mire khilaunoñ ke kaam aatī thī

merā pyaar

us ghar ke naam

jis kī sabz muñDeroñ par

mere haath kī rañgī huī gaurayyā ab bhī chahaktī hogī

jis ke taaq meñ merī nannhī guḌiyā ab bhī sotī hogī

merā rasta taktī hogī chupke chupke rotī hogī

merā pyaar

us khet aur us khaliyān ke naam

jahāñ meñ chāñdnī rātoñ ko

aksar āñkh-micholī khelā kartī thī

merā pyaar

un ujḌe hue bāġhāt ke naam

jahāñ banafsha rañg shagūfoñ aur kusum ke phūloñ meñ

maiñ pahroñ Dolā kartī thī

par phailātī cham-cham kartī tītriyoñ par martī thī

un kā ta.āqub kartī thī

merā pyaar

biite hue lamhāt ke naam

un ujḌe bāġhāt ke naam

un suune khañDarāt ke naam

jo mere purkhoñ kī anā kā madfan haiñ

mera pyar

us basti ke nam

jahan mere bachpan ki nannhi-munni yaaden soti hain

jahan meri masum tamannaon ne gharaunde khinche the

mera pyar

us ThanDe gahre nilam talab ke nam

jis ki ujli miTTi mere khilaunon ke kaam aati thi

mera pyar

us ghar ke nam

jis ki sabz munDeron par

mere hath ki rangi hui gaurayya ab bhi chahakti hogi

jis ke taq mein meri nannhi guDiya ab bhi soti hogi

mera rasta takti hogi chupke chupke roti hogi

mera pyar

us khet aur us khaliyan ke nam

jahan mein chandni raaton ko

aksar aankh-micholi khela karti thi

mera pyar

un ujDe hue baghat ke nam

jahan banafsha rang shagufon aur kusum ke phulon mein

main pahron Dola karti thi

par phailati cham-cham karti titriyon par marti thi

un ka taaqub karti thi

mera pyar

bite hue lamhat ke nam

un ujDe baghat ke nam

un sune khanDaraat ke nam

jo mere purkhon ki ana ka madfan hain