maftuha chithaDa

jañgī beva kā nā-mukammal giit

qarībī dariyā meñ kuchh sipāhiyoñ

ke saath Duub gayā

ghoḌe lāshoñ ke zaḳhmoñ meñ

dauḌte dauḌte gum ho ga.e

sipāhī talvār kī dhaar se luḌhakte hue

maidān-e-jañg ke vast meñ fat.h

kā lafz zamīn par likhne lage

maidān-e-jañg ghūmtā huā

lashkar ke pairoñ ke nīche se

sarak kar havā ke saath mil kar

mulk kī hudūd ko vasī.a karne lag gayā

sipah-sālār kā gūñjtā huā rajaz

bahut se sipāhiyoñ ke janāze

meñ tabdīl ho gayā

sipāhiyoñ kī lāsheñ talvār ke daste par

lage pasīne se pahle ḳhushk ho kar

maidān-e-jañg kī numāyāñ qabreñ ban ga.iiñ

aadmī jāntā hai ki talvār kī dhaar se

gardaneñ to kaaTī jā saktī haiñ

magar vo rajaz qatl nahīñ kiye jā sakte

jinheñ shab karne ke liye sipāhiyoñ ne

maaoñ ke pistānoñ se duudh se

ziyāda zabān kī tezī ko hāsil kiyā

jangi bewa ka na-mukammal git

qaribi dariya mein kuchh sipahiyon

ke sath Dub gaya

ghoDe lashon ke zaKHmon mein

dauDte dauDte gum ho gae

sipahi talwar ki dhaar se luDhakte hue

maidan-e-jang ke wast mein fath

ka lafz zamin par likhne lage

maidan-e-jang ghumta hua

lashkar ke pairon ke niche se

sarak kar hawa ke sath mil kar

mulk ki hudud ko wasia karne lag gaya

sipah-salar ka gunjta hua rajaz

bahut se sipahiyon ke janaze

mein tabdil ho gaya

sipahiyon ki lashen talwar ke daste par

lage pasine se pahle KHushk ho kar

maidan-e-jang ki numayan qabren ban gain

aadmi jaanta hai ki talwar ki dhaar se

gardanen to kaTi ja sakti hain

magar wo rajaz qatl nahin kiye ja sakte

jinhen shab karne ke liye sipahiyon ne

maon ke pistanon se dudh se

ziyaada zaban ki tezi ko hasil kiya