magar wo na aaya

maiñ ne āvāz dī

aur hisār-e-rifāqat meñ

us ko bulāyā

magar vo na aayā

gul-e-ḳhvāb kī patiyāñ

dhuup kī garm rāhat meñ gum thiiñ

mire jism par

narm bārish kī būñdeñ bhī ghoḌe kā sum thiiñ

zamīñ ek amboh-e-hijrāñ meñ

us chaap kī muntazir thī

jo lā-ilm phailāv meñ muntashir thī

parinde subuk reshmīñ Tahniyāñ

apnī minqār meñ thaam kar uḌ rahe the

nasheb-e-junūñ kī taraf

pāniyoñ kī tarah mere saa.e bahe the

kaf-e-chashm par maiñ ne us ke liye

shahr-e-girya sajāyā

magar vo na aayā

kisī samt se us kī aahaT na aa.ī

bahut der tak raat ke sard-ḳhāne meñ

ik aag maiñ ne jalā.ī

kahīñ duur se

koī be-ant mahrūm āvāz aa.ī

judā.ī judā.ī

to phir maiñ ne us ke liye dhund hamvār kī

rasta-e-nau banāyā

magar vo na aayā

main ne aawaz di

aur hisar-e-rifaqat mein

us ko bulaya

magar wo na aaya

gul-e-KHwab ki patiyan

dhup ki garm rahat mein gum thin

mere jism par

narm barish ki bunden bhi ghoDe ka sum thin

zamin ek amboh-e-hijran mein

us chap ki muntazir thi

jo la-ilm phailaw mein muntashir thi

parinde subuk reshmin Tahniyan

apni minqar mein tham kar uD rahe the

nasheb-e-junun ki taraf

paniyon ki tarah mere sae bahe the

kaf-e-chashm par main ne us ke liye

shahr-e-girya sajaya

magar wo na aaya

kisi samt se us ki aahaT na aai

bahut der tak raat ke sard-KHane mein

ek aag main ne jalai

kahin dur se

koi be-ant mahrum aawaz aai

judai judai

to phir main ne us ke liye dhund hamwar ki

rasta-e-nau banaya

magar wo na aaya