maghlub

shumāl meñ barf tezī se ghul rahī hai

zamīñ kā naqsha badal rahā hai

samundaroñ meñ chaḌhā huā hai ga.e zamānoñ kā taaza paanī

ka.ī jazīre to ab bhī haiñ be-ḳhabar magar kal

kahīñ na hoñge

badalne vaalī haiñ sarhadeñ par

baḌā hī shīrīñ hai ḳhvāb-e-ġhaflat

hamāre andāze ḳhvāb sab pīchhe rah ga.e haiñ

samundaroñ meñ bahut se tūfān uTh chuke haiñ

idhar zamīñ par

bisāt par bāziyoñ kī tezī nazar se ojhal

udhar falak par sitāre ojhal

vo jin ko shah-māt ho rahī hai vo saare ojhal

kahf ke ġhāroñ meñ so rahe haiñ

vo jin ke sāhil jazīre firdaus-e-muntazar ke

nishān-e-be-nām hone ko haiñ

koī to jākar unheñ jagā.e

unheñ batā.e

zamīñ kā naqsha badal rahā hai

zamīñ se tūfān uTh rahe haiñ

samundaroñ meñ badal rahe haiñ

shumal mein barf tezi se ghul rahi hai

zamin ka naqsha badal raha hai

samundaron mein chaDha hua hai gae zamanon ka taza pani

kai jazire to ab bhi hain be-KHabar magar kal

kahin na honge

badalne wali hain sarhaden par

baDa hi shirin hai KHwab-e-ghaflat

hamare andaze KHwab sab pichhe rah gae hain

samundaron mein bahut se tufan uTh chuke hain

idhar zamin par

bisat par baziyon ki tezi nazar se ojhal

udhar falak par sitare ojhal

wo jin ko shah-mat ho rahi hai wo sare ojhal

kahf ke ghaaron mein so rahe hain

wo jin ke sahil jazire firdaus-e-muntazar ke

nishan-e-be-nam hone ko hain

koi to jakar unhen jagae

unhen batae

zamin ka naqsha badal raha hai

zamin se tufan uTh rahe hain

samundaron mein badal rahe hain