maha-bhaarat

bin-lāden

torā-borā meñ hotā

to aisī mahsharī maar

jis se

pahāḌ surma ban ga.e

zamīn raakh ho ga.ī

āsmān siyāh paḌ gayā

kab kā ḳhatm ho chukā hotā

magar kurra-e-arz par jagah jagah

haibatnāk ātishīñ phuñkāreñ

karbnāk dil-doz chīḳheñ

is haqīqat kī ġhammāz haiñ

ki bin-lāden

mirā nahīñ

zinda hai

ye phuñkāreñ aur chīḳheñ

is baat kī bhī dalīl haiñ

ki lāden

torā-borā ke alāva

dūsre ḳhittoñ meñ bhī maujūd hai

savāl ye hai ki

lāden ḳhatm kyuuñ nahīñ huā

kyā vo vāqa.ī itnā zabardast hai

ki saare jahān kī majmūī tāqat bhī

us ke aage hech hai

kyā us ne āb-e-hayāt pī lī hai

ki kabhī mar nahīñ saktā

kyā vo qafas bin gayā hai

ki apnī ḳhākistar se phir paidā ho jaatā hai

kyā vo shud sikandarī hai

ki yājūj-mājūj kī zabāneñ

use puurī tarah chaaT nahīñ pātīñ

kyā vo rāvan hai

ki us kā ek sar afghanistan meñ

to baaqī nau dūsre jahāñ meñ

aur kyā us ne koī vardān pā liyā hai

ki sar kaT kar phir dhaḌ se aa lagtā hai

kyā vo bhisham-pitāma hai

ki apnī achchhā ke baġhair mar nahīñ saktā

kyā us ne apnā clone banā liyā hai

ki us kā ḳhātma nā-mumkin ho gayā hai

savāl ye bhī hai

ki mīzā.iloñ kā nishāna chuuk kyuuñ jaatā hai

kyā un ke purze Dhīle haiñ

ki vo apnā tavāzun kho baiThtī haiñ

be-samtī kā shikār ho jaatī haiñ

kyā vo andhī haiñ

ki bin-lāden ko dekh nahīñ pātīñ

kyā un kī bīnā.ī kamzor hai

ki vo lāden aur ġhair-lāden meñ tamīz nahīñ kar pātīñ

bin lāden koī sach to nahīñ

ki shakunī kī chaal us ke aage nākām ho jaa.e

vo lākshā girah se bach kar nikal jaa.e

agyāt-bass se vāpas aa jaa.e

us kā chīr-haran na ho sake

tīroñ kī shayyā par zinda rah jaa.e

kahīñ aisā to nahīñ

ki missileñ use mārnā hī nahīñ chāhatīñ

agar aisā hai

to ye mahsharī maar

kis ke liye

ye musalsal yalġhār

kyuuñ

hairān-o-pareshān arjun

krukshetra meñ chīḳhtā phir rahā hai

magar aaj kī mahā-bhārat meñ

in savāloñ kā javāb dene vaalā

koī kirshn nahīñ

koī kirshn nahīñ

bin-laden

tora-bora mein hota

to aisi mahshari mar

jis se

pahaD surma ban gae

zamin rakh ho gai

aasman siyah paD gaya

kab ka KHatm ho chuka hota

magar kurra-e-arz par jagah jagah

haibatnak aatishin phunkaren

karbnak dil-doz chiKHen

is haqiqat ki ghammaz hain

ki bin-laden

mera nahin

zinda hai

ye phunkaren aur chiKHen

is baat ki bhi dalil hain

ki laden

tora-bora ke alawa

dusre KHitton mein bhi maujud hai

sawal ye hai ki

laden KHatm kyun nahin hua

kya wo waqai itna zabardast hai

ki sare jahan ki majmui taqat bhi

us ke aage hech hai

kya us ne aab-e-hayat pi li hai

ki kabhi mar nahin sakta

kya wo qafas bin gaya hai

ki apni KHakistar se phir paida ho jata hai

kya wo shud sikandari hai

ki yajuj-majuj ki zabanen

use puri tarah chaT nahin patin

kya wo rawan hai

ki us ka ek sar afghanistan mein

to baqi nau dusre jahan mein

aur kya us ne koi wardan pa liya hai

ki sar kaT kar phir dhaD se aa lagta hai

kya wo bhisham-pitama hai

ki apni achchha ke baghair mar nahin sakta

kya us ne apna clone bana liya hai

ki us ka KHatma na-mumkin ho gaya hai

sawal ye bhi hai

ki mizailon ka nishana chuk kyun jata hai

kya un ke purze Dhile hain

ki wo apna tawazun kho baiThti hain

be-samti ka shikar ho jati hain

kya wo andhi hain

ki bin-laden ko dekh nahin patin

kya un ki binai kamzor hai

ki wo laden aur ghair-laden mein tamiz nahin kar patin

bin laden koi sach to nahin

ki shakuni ki chaal us ke aage nakaam ho jae

wo laksha girah se bach kar nikal jae

agyat-bass se wapas aa jae

us ka chir-haran na ho sake

tiron ki shayya par zinda rah jae

kahin aisa to nahin

ki missilen use marna hi nahin chahatin

agar aisa hai

to ye mahshari mar

kis ke liye

ye musalsal yalghaar

kyun

hairan-o-pareshan arjun

krukshetra mein chiKHta phir raha hai

magar aaj ki maha-bhaarat mein

in sawalon ka jawab dene wala

koi kirshn nahin

koi kirshn nahin