mahbuba ke liye aaKHiri nazm

pahle jitnī bāteñ thiiñ vo tum se thiiñ

tere hī naam kī ek radīf se saare qāfiye

bante aur bigaḌte the

maiñ apne andhe hāthoñ se

tere jism ke pur-asrār zamānoñ kī tahrīreñ paḌh letā thā

aur phir achchhī achchhī nazmeñ ghaḌ letā thā

tū bhī to kāġhaz ke phūloñ kī mānind

har mausam meñ khil jaatī thī

or maiñ hijr-o-visāl kī ḳhushkī aur tarī par

tere liye har haal meñ zinda rah letā thā

apne liye bhī terī taraf se

saarī bāteñ kah letā thā

terī sūrat mere hone aur na hone

jāgne sone kī is dhuup aur chhāñv meñ

ek hī jaisī rahtī thī

aur merī sāñsoñ kā baḳht tumhāre hī pallū se bañdhā thā

lekin ab to terī saaḌī ke sab lahariye

mere jism ko Das bhī chuke haiñ

ab to jaao

merī purānī nazmoñ kī almārī meñ ārām se jā kar so jaao

kyūñki maiñ ab apne aap se bāteñ karnā chāhtā huuñ

pahle jitni baaten thin wo tum se thin

tere hi nam ki ek radif se sare qafiye

bante aur bigaDte the

main apne andhe hathon se

tere jism ke pur-asrar zamanon ki tahriren paDh leta tha

aur phir achchhi achchhi nazmen ghaD leta tha

tu bhi to kaghaz ke phulon ki manind

har mausam mein khil jati thi

or main hijr-o-visal ki KHushki aur tari par

tere liye har haal mein zinda rah leta tha

apne liye bhi teri taraf se

sari baaten kah leta tha

teri surat mere hone aur na hone

jagne sone ki is dhup aur chhanw mein

ek hi jaisi rahti thi

aur meri sanson ka baKHt tumhaare hi pallu se bandha tha

lekin ab to teri saDi ke sab lahariye

mere jism ko Das bhi chuke hain

ab to jao

meri purani nazmon ki almari mein aaram se ja kar so jao

kyunki main ab apne aap se baaten karna chahta hun