mahbuba ki qabr par

tirī sāñseñ hasīñ mausam ko thāme duur kī rāhoñ pe jā nikleñ

magar phir bhī mirī āñkhoñ ke sāhil par ye likkhā hai

ki tū ik din hamesha kī tarah hañstī mahaktī

shaam kī pāzeb jhankātī mire ghar lauT aa.egī

magar is ḳhvāb kī kachchī kalī jab bhī mahakne ko zarā taḌpī

to sarkash āñdhiyāñ chal deñ

so ab tū hī batā mujh ko

maiñ hāthoñ kī lakīroñ ke safar par jā.ūñ to kaise

maiñ Thahrā aks kā qaidī

jo sochoñ ke siyah parde pe tasvīreñ banātā hai

mujhe shahroñ ke jangal se kahāñ nirvān milnā thā

ye tere ḳhvāb ke andhe bayābāñ aaj merā gyaan Thahre haiñ

maiñ kāñdhoñ par azal se āsmāñ rakkhe

zamānoñ kī tahoñ meñ gum

usī pal ke dorāhe par khaḌā āvāz detā huuñ

ki jis lamhe tirī sāñseñ

hasīñ mausam ko thāme duur kī rāhoñ pe jā niklīñ

diloñ ke gumbadoñ meñ koī bhī naġhma nahīñ gūñjā

na andhī raat ke dar par kisī kī dastakeñ gūñjīñ

maiñ ḳhud pe munkashif hone ko huuñ āḳhir

ki maiñ apne ta.āqub meñ

tirī yādoñ ke dhuñdle rāstoñ kā ik musāfir huuñ

sunahre sūrajoñ kī ek chingārī kā tālib huuñ

teri sansen hasin mausam ko thame dur ki rahon pe ja niklen

magar phir bhi meri aankhon ke sahil par ye likkha hai

ki tu ek din hamesha ki tarah hansti mahakti

sham ki pazeb jhankati mere ghar lauT aaegi

magar is KHwab ki kachchi kali jab bhi mahakne ko zara taDpi

to sarkash aandhiyan chal den

so ab tu hi bata mujh ko

main hathon ki lakiron ke safar par jaun to kaise

main Thahra aks ka qaidi

jo sochon ke siyah parde pe taswiren banata hai

mujhe shahron ke jangal se kahan nirwan milna tha

ye tere KHwab ke andhe bayaban aaj mera gyan Thahre hain

main kandhon par azal se aasman rakkhe

zamanon ki tahon mein gum

usi pal ke dorahe par khaDa aawaz deta hun

ki jis lamhe teri sansen

hasin mausam ko thame dur ki rahon pe ja niklin

dilon ke gumbadon mein koi bhi naghma nahin gunja

na andhi raat ke dar par kisi ki dastaken gunjin

main KHud pe munkashif hone ko hun aaKHir

ki main apne taaqub mein

teri yaadon ke dhundle raston ka ek musafir hun

sunahre surajon ki ek chingari ka talib hun