محبوبہ کی قبر پر

تری سانسیں حسیں موسم کو تھامے دور کی راہوں پہ جا نکلیں

مگر پھر بھی مری آنکھوں کے ساحل پر یہ لکھا ہے

کہ تو اک دن ہمیشہ کی طرح ہنستی مہکتی

شام کی پازیب جھنکاتی مرے گھر لوٹ آئے گی

مگر اس خواب کی کچی کلی جب بھی مہکنے کو ذرا تڑپی

تو سرکش آندھیاں چل دیں

سو اب تو ہی بتا مجھ کو

میں ہاتھوں کی لکیروں کے سفر پر جاؤں تو کیسے

میں ٹھہرا عکس کا قیدی

جو سوچوں کے سیہ پردے پہ تصویریں بناتا ہے

مجھے شہروں کے جنگل سے کہاں نروان ملنا تھا

یہ تیرے خواب کے اندھے بیاباں آج میرا گیان ٹھہرے ہیں

میں کاندھوں پر ازل سے آسماں رکھے

زمانوں کی تہوں میں گم

اسی پل کے دوراہے پر کھڑا آواز دیتا ہوں

کہ جس لمحے تری سانسیں

حسیں موسم کو تھامے دور کی راہوں پہ جا نکلیں

دلوں کے گنبدوں میں کوئی بھی نغمہ نہیں گونجا

نہ اندھی رات کے در پر کسی کی دستکیں گونجیں

میں خود پہ منکشف ہونے کو ہوں آخر

کہ میں اپنے تعاقب میں

تری یادوں کے دھندلے راستوں کا اک مسافر ہوں

سنہرے سورجوں کی ایک چنگاری کا طالب ہوں