میں عبداللہ سوچ رہا ہوں

صدیوں پہلے

اپنے پرکھے

جنگل ویرانوں میں رہتے

سانپوں اور خونخوار درندوں

سے بچ بچ کر

یا لڑ لڑ کر

زندہ رہنے کے سارے گر سیکھ گئے تھے

آج کی دنیا میں ہم نے بھی

سچا جھوٹا ساتھ نبھا کر

دھوکہ دے کر دھوکا کھا کر

اپنوں اور بیگانوں سے بھی

یا قربت یا دوری رکھ کر

زندہ رہنا سیکھ لیا ہے

فرق ہے اتنا

اک خونخوار درندے کا تو

اپنی کھال سے باہر آنا

بھیس بدلنا نا ممکن تھا

پرکھوں کا اس کو پہچان کے اس سے بچنا

کوئی مشکل کام نہیں تھا

لیکن آج کے اندھے یگ میں

سب انسانوں کے چہروں پر

کتنے چہرے چڑھے ہوئے ہیں

ان کے اصلی روپ کو ہم کیسے پہچانیں

کیسے ان سے خود کو بچائیں

اس کا ہم کو گیان نہیں ہے

میں عبداللہؔ سوچ رہا ہوں

جنگل ویرانوں کے باسی اپنے پرکھوں کا جیون تو

آج کے یگ میں اپنے جیون

کے آگے آسان بہت تھا