main aur tu

ḳhudā-vand.... mujh meñ kahāñ hausla hai

ki maiñ tujh se nazreñ milā.ūñ

tirī shaan meñ kuchh kahūñ

tujhe apnī nazroñ se nīche girā.ūñ

ḳhudā-vand mujh meñ kahāñ hausla hai

ki tū

roz-e-avval se pahle bhī maujūd thā

aaj bhī hai

hamesha rahegā

aur maiñ

merī hastī hī kyā hai

aaj huuñ

kal nahīñ huuñ

ḳhudā-vand mujh meñ kahāñ hausla hai

magar aaj ik baat kahnī hai tujh se

ki maiñ aaj huuñ

kal nahīñ huuñ

ye sach hai magar

koī aisā nahīñ hai

ki jo mere hone se inkār kar de

kisī meñ ye jur.at nahīñ hai

magar tū

bahut log kahte haiñ tujh ko

ki tū vahm hai

aur kuchh bhī nahīñ hai

KHuda-wand mujh mein kahan hausla hai

ki main tujh se nazren milaun

teri shan mein kuchh kahun

tujhe apni nazron se niche giraun

KHuda-wand mujh mein kahan hausla hai

ki tu

roz-e-awwal se pahle bhi maujud tha

aaj bhi hai

hamesha rahega

aur main

meri hasti hi kya hai

aaj hun

kal nahin hun

KHuda-wand mujh mein kahan hausla hai

magar aaj ek baat kahni hai tujh se

ki main aaj hun

kal nahin hun

ye sach hai magar

koi aisa nahin hai

ki jo mere hone se inkar kar de

kisi mein ye jurat nahin hai

magar tu

bahut log kahte hain tujh ko

ki tu wahm hai

aur kuchh bhi nahin hai