main bilkul Thik hun sohni

tumhārā ek message whatsapp par muddatoñ ke ba.ad aayā thā

ye likkhā thā ki

busy thā maiñ so reply na kar paayā

zarā us vaqt kuchh sāñsoñ kī tuġhyānī sī barpā thī

mujhe kuchh dhaḌkanoñ ko bhī zarā tartīb denā thā

mobile scrēn us vaqt dhundlī ho ga.ī thī kuchh

busy thā maiñ so reply na kar paayā

so sorry ai mirī sohnī

suno tum ne ye likkhā thā ki

maiñ bilkul Thiik huuñ sohnī

tumhārī yaad hī aatī nahīñ mujh ko

so bilkul Thiik rahtā huuñ

magar haañ jab zarā maiñ saañs letā huuñ

zarā jab dil dhaḌaktā hai

to phir tum yaad aatī ho

magar is ke alāva Thiik rahtā huuñ

zarā sar meñ tanāv kī sī kaifiyyat to rahtī hai

ragoñ meñ bhī khiñchāo sā zarā rahtā hai ab aksar

magar baaqī sabhī kuchh Thiik hai sohnī

zarā jab saañs letā huuñ to andar kuchh chubhan sī hone lagtī hai

kahīñ kuchh zaḳhm sā hogā

magar baaqī sabhī kuchh Thiik hai sohnī

zarā bas dil dhaḌaktā hai to siine meñ kisī kī siskiyāñ mujh ko sunā.ī dene lagtī haiñ

magar baaqī sabhī kuchh Thiik hai sohnī

are haañ kal maiñ ā.īne ke aage jab zarā aayā

vahāñ ik ajnabī chehra nazar aayā

bahut hī zard sā chehra

aur us kī aañkh ke halqe meñ gaDDhe se nazar aa.e

ajab vahshat Tapaktī thī

vahāñ se bhaag aayā maiñ

magar baaqī sabhī kuchh Thiik hai sohnī

suno phir bhī maiñ kal ik doctor se ehtiyātan mil bhī aayā huuñ

vo kahte haiñ ki ghabrāne kī koī baat bilkul bhī nahīñ is meñ

zarā bas saañs tham jaa.e

zarā dhaḌkan bhī jam jaa.e

to phir sab kuchh hamesha ke liye hī Thiik ho jaa.e

tumhaara ek message whatsapp par muddaton ke baad aaya tha

ye likkha tha ki

busy tha main so reply na kar paya

zara us waqt kuchh sanson ki tughyani si barpa thi

mujhe kuchh dhaDkanon ko bhi zara tartib dena tha

mobile screen us waqt dhundli ho gai thi kuchh

busy tha main so reply na kar paya

so sorry ai meri sohni

suno tum ne ye likkha tha ki

main bilkul Thik hun sohni

tumhaari yaad hi aati nahin mujh ko

so bilkul Thik rahta hun

magar han jab zara main sans leta hun

zara jab dil dhaDakta hai

to phir tum yaad aati ho

magar is ke alawa Thik rahta hun

zara sar mein tanaw ki si kaifiyyat to rahti hai

ragon mein bhi khinchao sa zara rahta hai ab aksar

magar baqi sabhi kuchh Thik hai sohni

zara jab sans leta hun to andar kuchh chubhan si hone lagti hai

kahin kuchh zaKHm sa hoga

magar baqi sabhi kuchh Thik hai sohni

zara bas dil dhaDakta hai to sine mein kisi ki siskiyan mujh ko sunai dene lagti hain

magar baqi sabhi kuchh Thik hai sohni

are han kal main aaine ke aage jab zara aaya

wahan ek ajnabi chehra nazar aaya

bahut hi zard sa chehra

aur us ki aankh ke halqe mein gaDDhe se nazar aae

ajab wahshat Tapakti thi

wahan se bhag aaya main

magar baqi sabhi kuchh Thik hai sohni

suno phir bhi main kal ek doctor se ehtiyatan mil bhi aaya hun

wo kahte hain ki ghabrane ki koi baat bilkul bhi nahin is mein

zara bas sans tham jae

zara dhaDkan bhi jam jae

to phir sab kuchh hamesha ke liye hi Thik ho jae