main do janma

aaj kā din aur kal jo guzar gayā ye donoñ

mere shānoñ par baiThe haiñ

kal kā din baa.eñ kandhe par jam kar baiThā

mere baa.eñ kaan kī nāzuk lau ko pakḌe

chīḳh chīḳh kar ye elaan kiye jaatā hai

''maiñ zinda huuñ!

baa.eñ jānib kandhā moḌ ke dekho mujh ko''

aaj kā din jo

daa.eñ kandhe par ārām se paañv phailā kar baiThā hai

baar baar dhīme lahje meñ ek hī baat ko dohrātā hai

''mat dekho us ajal-rsīda kal ko

jo ab kisī bhī dam uThne vaalā hai

mujh ko dekho, baat karo, maiñ chaltā-phirtā aaj kā din huuñ

saañs kī Dorī mujh se bañdhī hai

kyā lenā denā hai ik āsūda-e-ḳhāk se ham jaise zindoñ ko''

daa.eñ baa.eñ gardan moḌ ke donoñ kī bāteñ suntā huuñ

gardan meñ bal paḌ jaatā hai

kuchh sustā kar phir sunñe lagtā huuñ in kī raam kahānī!

shāyad sach kahte haiñ donoñ!

maazī bhalā kahāñ martā hai?

zindoñ se bhī bad-tar, ye murda to zehn meñ gaḌā huā hai

jaise kaale marmar kī sil kā katba ho

aur phir aaj kā zinda paikar?

aane vaale kal ke din tak is ko maiñ kaise jhuTlā.ūñ

koī batā.e

maiñ do-janmā

apne do shānoñ par baiThe aaj aur kal se kaise nipTūñ?

aaj ka din aur kal jo guzar gaya ye donon

mere shanon par baiThe hain

kal ka din baen kandhe par jam kar baiTha

mere baen kan ki nazuk lau ko pakDe

chiKH chiKH kar ye elan kiye jata hai

main zinda hun!

baen jaanib kandha moD ke dekho mujh ko

aaj ka din jo

daen kandhe par aaram se panw phaila kar baiTha hai

bar bar dhime lahje mein ek hi baat ko dohraata hai

mat dekho us ajal-rsida kal ko

jo ab kisi bhi dam uThne wala hai

mujh ko dekho, baat karo, main chalta-phirta aaj ka din hun

sans ki Dori mujh se bandhi hai

kya lena dena hai ek aasuda-e-KHak se hum jaise zindon ko

daen baen gardan moD ke donon ki baaten sunta hun

gardan mein bal paD jata hai

kuchh susta kar phir sunne lagta hun in ki ram kahani!

shayad sach kahte hain donon!

mazi bhala kahan marta hai?

zindon se bhi bad-tar, ye murda to zehn mein gaDa hua hai

jaise kale marmar ki sil ka katba ho

aur phir aaj ka zinda paikar?

aane wale kal ke din tak is ko main kaise jhuTlaun

koi batae

main do-janma

apne do shanon par baiThe aaj aur kal se kaise nipTun?