main, ek aur main

mujh se achchhā nahīñ

kuchh burā bhī nahīñ

Thiik mujh sā bhī shāyad nahīñ

mujh ko mahsūs hotā hai kuchh muḳhtalif bhī nahīñ

vo jo ik ajnabī aaj aayā hai is shahr meñ

ain-mumkin hai paidā yahīñ vo huā ho

javāñ ho gayā to kisī dūsre des meñ jā basā

nā-ravā mausamoñ ke thapeḌoñ kī yalġhār meñ

kuchh fasurda o maġhmūm bikhrā huā

lauT aayā ho ik roz apne purāne isi shahr meñ

ye bhī mumkin hai vo

ek dushman qabīle kā koī safīr-e-adāvat yā dahshat ho yā phir koī

hijratoñ ke tasalsul kā vāmāñda rah-rau

ghaḌī do ghaḌī ke liye mere is shahr meñ ruk gayā ho

vo ik be-gharī se kisī dūsrī be-gharī meñ yahāñ aa gayā ho

vo mafrūr qātil ho mumkin hai is shahr ko

kunj-e-mahfūz shāyad samajhtā ho ye sochtā ho

guzar jā.eñge āfiyat se shab o roz baaqī ke us ke yahāñ

maiñ to sar-sabz-o-shādāb barsoñ jiyā lahlahāyā isī ḳhaak par

jism apnā thā maiñ

zehn apnā thā maiñ

ḳhud se maqdūr ke dā.ere meñ shanāsā bhī thā

hādsa mujh pe guzrā ajab ye ki maiñ

aaj apnī hī pahchān ke kaise āzār meñ ghir gayā

ab yahāñ kaun huuñ

naam merā hai kyā

kis kā ham-dam huuñ maiñ

kis kā ham-zād huuñ

kaun merā hai ham-zād chāroñ taraf se umaDtī huī bhiiḌ meñ

bād-e-masmūm meñ

jism o jaañ ko jhulastī huī reg-e-paikār meñ ghar gayā

maiñ mukāfāt ke sail-e-asrār maiñ ghar gayā

mujh se achchha nahin

kuchh bura bhi nahin

Thik mujh sa bhi shayad nahin

mujh ko mahsus hota hai kuchh muKHtalif bhi nahin

wo jo ek ajnabi aaj aaya hai is shahr mein

ain-mumkin hai paida yahin wo hua ho

jawan ho gaya to kisi dusre des mein ja basa

na-rawa mausamon ke thapeDon ki yalghaar mein

kuchh fasurda o maghmum bikhra hua

lauT aaya ho ek roz apne purane isi shahr mein

ye bhi mumkin hai wo

ek dushman qabile ka koi safir-e-adawat ya dahshat ho ya phir koi

hijraton ke tasalsul ka wamanda rah-rau

ghaDi do ghaDi ke liye mere is shahr mein ruk gaya ho

wo ek be-ghari se kisi dusri be-ghari mein yahan aa gaya ho

wo mafrur qatil ho mumkin hai is shahr ko

kunj-e-mahfuz shayad samajhta ho ye sochta ho

guzar jaenge aafiyat se shab o roz baqi ke us ke yahan

main to sar-sabz-o-shadab barson jiya lahlahaya isi KHak par

jism apna tha main

zehn apna tha main

KHud se maqdur ke daere mein shanasa bhi tha

hadsa mujh pe guzra ajab ye ki main

aaj apni hi pahchan ke kaise aazar mein ghir gaya

ab yahan kaun hun

nam mera hai kya

kis ka ham-dam hun main

kis ka ham-zad hun

kaun mera hai ham-zad chaaron taraf se umaDti hui bhiD mein

baad-e-masmum mein

jism o jaan ko jhulasti hui reg-e-paikar mein ghar gaya

main mukafat ke sail-e-asrar main ghar gaya