main

ek ḳhaliya huuñ maiñ

zindagī kī ikaa.ī huuñ maiñ

TuuT kar ban rahā huuñ azal se yūñhī

maiñ anāsir kī tartīb huuñ

maiñ shu.ūr-o-nazar kī vo buniyād huuñ

jis pe qaa.em riyāzī ke TeḌhe sutūñ

jis kī shāḳheñ haiñ advār ke falsafe

jo adab art sañgīt kī ruuh haiñ

ek zarra huuñ maiñ

TuuT kar ban rahā huuñ azal se yūñhī

mere har reza-e-muḳhtasar meñ na.ī zindagī

mere har sālme meñ na.ī ziist hai

ek qatra huuñ maiñ us samundar kā jis kī ġhazabnāk amvāj meñ

kashtiyāñ kahkashāoñ kī phirtī haiñ tinkoñ kī mānind bahtī huī

maiñ samundar huuñ qatra merā naam hai

ek ḳhaliya huuñ lekin mukammal hayāt

ek zarra magar markaz-e-kā.enāt

maiñ hī maḳhlūq huuñ

maiñ hī ḳhāliq huuñ duniyā kā ma.abūd huuñ

maiñ hī maiñ huuñ azal se abad tak yahāñ se vahāñ tak

faqat maiñ hī maiñ

ek KHaliya hun main

zindagi ki ikai hun main

TuT kar ban raha hun azal se yunhi

main anasir ki tartib hun

main shuur-o-nazar ki wo buniyaad hun

jis pe qaem riyazi ke TeDhe sutun

jis ki shaKHen hain adwar ke falsafe

jo adab art sangit ki ruh hain

ek zarra hun main

TuT kar ban raha hun azal se yunhi

mere har reza-e-muKHtasar mein nai zindagi

mere har salme mein nai zist hai

ek qatra hun main us samundar ka jis ki ghazabnak amwaj mein

kashtiyan kahkashaon ki phirti hain tinkon ki manind bahti hui

main samundar hun qatra mera nam hai

ek KHaliya hun lekin mukammal hayat

ek zarra magar markaz-e-kaenat

main hi maKHluq hun

main hi KHaliq hun duniya ka mabud hun

main hi main hun azal se abad tak yahan se wahan tak

faqat main hi main