main

fazā kī chīḳh huuñ maiñ ik fuġhāñ huuñ

añdherī raat meñ mātam kunāñ huuñ

har ik daur-e-bahārāñ mere bas meñ

maiñ apne ḳhār-o-gul kī pāsbāñ huuñ

azal se huuñ abad tak maiñ rahūñgī

payām-e-dard huuñ dil meñ nihāñ huuñ

mire andar kī dīvāreñ girī haiñ

ba-zāhir maiñ hisār-e-be-karāñ huuñ

mujhe barsāt meñ aa kar jalā de

samajh le barq meñ ik āshiyāñ huuñ

mirī pastī meñ hai rāz-e-bulandī

zamīñ par maiñ to rashk-e-āsmāñ huuñ

abhī rāhoñ meñ hai takmīl merī

adhūrī baat tishna-dāstāñ huuñ

faza ki chiKH hun main ek fughan hun

andheri raat mein matam kunan hun

har ek daur-e-bahaaran mere bas mein

main apne KHar-o-gul ki pasban hun

azal se hun abad tak main rahungi

payam-e-dard hun dil mein nihan hun

mere andar ki diwaren giri hain

ba-zahir main hisar-e-be-karan hun

mujhe barsat mein aa kar jala de

samajh le barq mein ek aashiyan hun

meri pasti mein hai raaz-e-bulandi

zamin par main to rashk-e-asman hun

abhi rahon mein hai takmil meri

adhuri baat tishna-dastan hun