main girta hun

jab maiñ ḳhvāboñ kī sat.h se girtā huuñ

vo hañste haiñ

aur āsmān kī bijlī un ke dāñtoñ meñ phañs jaatī hai

jab tiis dinoñ kī sīḌhī se har maah maiñ nīche girtā huuñ

vo hañste haiñ

aur un ke haath meñ mere badan kī miTTī hai

jab kachchī siyāhī aur qaiñchī se likhe hue aḳhbār se nīche girtā huuñ

vo hañste haiñ

aur un ke haath meñ mere naam kī kalġhī hai

jab havā aur dhuup ke haath se chhūT ke girtā huuñ

vo hañste haiñ

aur un ke haath meñ mere dil kī pattiyāñ haiñ

jab mahbūba ke dhyān se nīche girtā huuñ

vo hañste haiñ

aur un ke haath meñ merī aañkh kā paanī hai

jab maiñ kitāb ke sach aur din ke jhuuT se nīche girtā huuñ

vo hañste haiñ

aur un ke haath meñ merī umr ke safhe haiñ

maiñ girtā huuñ

aur un ko ye ma.alūm nahīñ

maiñ bilkul aise girtā huuñ ki

jaise pake hue phal meñ se biij kā daana girtā hai

maiñ apnī zamīn pe bilkul aise girtā huuñ

jab main KHwabon ki sath se girta hun

wo hanste hain

aur aasman ki bijli un ke danton mein phans jati hai

jab tis dinon ki siDhi se har mah main niche girta hun

wo hanste hain

aur un ke hath mein mere badan ki miTTi hai

jab kachchi siyahi aur qainchi se likhe hue aKHbar se niche girta hun

wo hanste hain

aur un ke hath mein mere nam ki kalghi hai

jab hawa aur dhup ke hath se chhuT ke girta hun

wo hanste hain

aur un ke hath mein mere dil ki pattiyan hain

jab mahbuba ke dhyan se niche girta hun

wo hanste hain

aur un ke hath mein meri aankh ka pani hai

jab main kitab ke sach aur din ke jhuT se niche girta hun

wo hanste hain

aur un ke hath mein meri umr ke safhe hain

main girta hun

aur un ko ye malum nahin

main bilkul aise girta hun ki

jaise pake hue phal mein se bij ka dana girta hai

main apni zamin pe bilkul aise girta hun