main gul nahin

maiñ gul nahīñ

mujhe dast-e-sabā se kaam nahīñ

na misl-e-barg na mānind-e-gul na shāḳh-e-gulāb

ki tund-o-tez havāoñ se kaañp kaañp uThūñ

ki sard-o-garm se mausam ke

Dar ke ziist karūñ

mujhe to garm havāoñ ne mil ke paalā hai

zamīñ ke habs ne

dam-ḳham ye mujh meñ Daalā hai

ki ek nanhā sā be-haisiyat vajūd mirā

zarā bhī nam jūñhī miTTī meñ apnī paatā hai

zamīñ kā chiir ke siina ye phuuT aatā hai

havā ke dhuup ke bārāñ ke barf ke mausam

jinheñ ye rashk-e-chaman hādsāt kahte haiñ

ye sīñchte haiñ mujhe merā qad baḌhāte haiñ

ye hādsāt tasarruf meñ mere rahte haiñ

gulāb belā chamelī o nastaran ke ye phuul

ye sīm-tan haiñ

mirā aisā koī naam nahīñ

khaḌī huuñ thaam ke āñdhī kī raas hāthoñ meñ

maiñ gul nahīñ

mujhe dast-e-sabā se kaam nahīñ

main gul nahin

mujhe dast-e-saba se kaam nahin

na misl-e-barg na manind-e-gul na shaKH-e-gulab

ki tund-o-tez hawaon se kanp kanp uThun

ki sard-o-garm se mausam ke

Dar ke zist karun

mujhe to garm hawaon ne mil ke pala hai

zamin ke habs ne

dam-KHam ye mujh mein Dala hai

ki ek nanha sa be-haisiyat wajud mera

zara bhi nam junhi miTTi mein apni pata hai

zamin ka chir ke sina ye phuT aata hai

hawa ke dhup ke baran ke barf ke mausam

jinhen ye rashk-e-chaman hadsat kahte hain

ye sinchte hain mujhe mera qad baDhate hain

ye hadsat tasarruf mein mere rahte hain

gulab bela chameli o nastaran ke ye phul

ye sim-tan hain

mera aisa koi nam nahin

khaDi hun tham ke aandhi ki ras hathon mein

main gul nahin

mujhe dast-e-saba se kaam nahin