main KHud sochta hun

hādse zindagī kī alāmat haiñ lekin vo ik hādsa

ham jise maut kahte haiñ

kab aur kaise kahāñ rū-numā ho koī jāntā hai

bilā-raib koī nahīñ jāntā

maiñ ḳhud sochtā huuñ mujhe ek muddat se kyā ho gayā hai

mere phaile hue jāgte zinda hāthoñ kī sab uñgliyāñ so chukī haiñ

mere larzāñ laboñ par jamī papḌiyāñ barq se raakh hote hue abr par ro chukī haiñ

ilm o irfān kī raah meñ jaise merī duā.eñ asar kho chukī haiñ

maiñ kyā jāntā huuñ

fanā ke tasalsul meñ koī girah Dālne ke liye

harf-e-kun kī zarūrat hai jo māñgne par bhī koī na degā

ki ab vo zamānoñ se bahte hue ḳhuun kā ḳhūñ-bahā to nahīñ hai

vo jis ke tasarruf meñ sab kuchh hai

husn-e-talab kī mujhe daad de kar agar ye kahe

ḳhuub ho tum magar jānte ho ki tum kaun ho

tum rah-e-raftagāñ kī masāfat kā ik aur āġhāz ho intihā to nahīñ ho

adam aur maujūd ke darmiyāñ ik kaḌī ho ḳhudā to nahīñ ho

to maiñ kyā kahūñgā maiñ ḳhud sochtā huuñ

hadse zindagi ki alamat hain lekin wo ek hadsa

hum jise maut kahte hain

kab aur kaise kahan ru-numa ho koi jaanta hai

bila-raib koi nahin jaanta

main KHud sochta hun mujhe ek muddat se kya ho gaya hai

mere phaile hue jagte zinda hathon ki sab ungliyan so chuki hain

mere larzan labon par jami papDiyan barq se rakh hote hue abr par ro chuki hain

ilm o irfan ki rah mein jaise meri duaen asar kho chuki hain

main kya jaanta hun

fana ke tasalsul mein koi girah Dalne ke liye

harf-e-kun ki zarurat hai jo mangne par bhi koi na dega

ki ab wo zamanon se bahte hue KHun ka KHun-baha to nahin hai

wo jis ke tasarruf mein sab kuchh hai

husn-e-talab ki mujhe dad de kar agar ye kahe

KHub ho tum magar jaante ho ki tum kaun ho

tum rah-e-raftagan ki masafat ka ek aur aaghaz ho intiha to nahin ho

adam aur maujud ke darmiyan ek kaDi ho KHuda to nahin ho

to main kya kahunga main KHud sochta hun