main kya chahta hun

maiñ kyā chāhtā huuñ maiñ kyā chāhtā huuñ

maiñ duniyā kā aalam nayā chāhtā huuñ

vo firqe jo rahte haiñ hindostāñ meñ

unheñ ek dil dekhnā chāhtā huuñ

ho maqsad yahāñ jin kā īzā-rasānī

maiñ un tāqatoñ kī fanā chāhtā huuñ

adāvat kā nafrat kā anjām bad hai

maiñ is baat ko sochnā chāhtā huuñ

ġharībī se ab jaan par aa banī hai

maiñ is haal ko roknā chāhtā huuñ

vatan kī taraqqī kā hai raaz is meñ

maiñ āzād āb-o-havā chāhtā huuñ

bane des phir apnā sone kī chiḌiyā

kuchh aisī na.ī kīmiyā chāhtā huuñ

jo kahte haiñ ye kīmiyā hurriyat hai

maiñ tā.īd un kī kyā chāhtā huuñ

milegī na ye kīmiyā be-kiye kuchh

ye ik baat sīdhī kahā chāhtā huuñ

na.ī baat hai mujh ko 'nayyar' gavāra

har andāz apnā nayā chāhtā huuñ

main kya chahta hun main kya chahta hun

main duniya ka aalam naya chahta hun

wo firqe jo rahte hain hindostan mein

unhen ek dil dekhna chahta hun

ho maqsad yahan jin ka iza-rasani

main un taqaton ki fana chahta hun

adawat ka nafrat ka anjam bad hai

main is baat ko sochna chahta hun

gharibi se ab jaan par aa bani hai

main is haal ko rokna chahta hun

watan ki taraqqi ka hai raaz is mein

main aazad aab-o-hawa chahta hun

bane des phir apna sone ki chiDiya

kuchh aisi nai kimiya chahta hun

jo kahte hain ye kimiya hurriyat hai

main taid un ki kya chahta hun

milegi na ye kimiya be-kiye kuchh

ye ek baat sidhi kaha chahta hun

nai baat hai mujh ko 'nayyar' gawara

har andaz apna naya chahta hun