main mazi nahin hun

maiñ kab tak

yūñhī ḳhāndānī shujā.at sharāfat kī tārīḳh rakhtā rahūñgā

yūñhī apne aslāf kī shān-o-shaukat kī bāteñ karūñgā

maiñ maazī nahīñ huuñ

maiñ apne meñ maujūd jiitā rahā huuñ

maiñ apne qadam kī sulagtī zamīñ par hī chaltā rahā huuñ

zamāne kī bhaTTī meñ taptā rahā huuñ

mire vaqt ne mujh ko kundan banāyā

maiñ jo kuchh huuñ maiñ huuñ

abhī koī guzrā huā pal nahīñ huuñ

maiñ maujūd huuñ haal se merā rishta rahegā barābar

maiñ maazī nahīñ huuñ

maiñ huuñ ahd-e-hāzir

maiñ apne zamāne kī tārīḳh huuñ ḳhud

mirā zikr hī tazkira haal kā hai

mujhe apnī bāteñ sunānī haiñ sab ko

sunā.ūñgā ab maiñ

sunā kar rahūñgā

main kab tak

yunhi KHandani shujaat sharafat ki tariKH rakhta rahunga

yunhi apne aslaf ki shan-o-shaukat ki baaten karunga

main mazi nahin hun

main apne mein maujud jita raha hun

main apne qadam ki sulagti zamin par hi chalta raha hun

zamane ki bhaTTi mein tapta raha hun

mere waqt ne mujh ko kundan banaya

main jo kuchh hun main hun

abhi koi guzra hua pal nahin hun

main maujud hun haal se mera rishta rahega barabar

main mazi nahin hun

main hun ahd-e-hazir

main apne zamane ki tariKH hun KHud

mera zikr hi tazkira haal ka hai

mujhe apni baaten sunani hain sab ko

sunaunga ab main

suna kar rahunga