main na kahta tha tum se

maiñ na kahtā thā tum se rah meñ chhoḌ jāogī

ishq ik riyāzat hai kaise Thair pāogī

aag kā ye dariyā hai kyuuñ kar tair pāogī

maiñ na kahtā thā tum se

ishq ik ibādat hai payambarī amānat hai

ḳhāroñ se ye pur rasta

kab talak chalogī tum

saath chhoḌ jāogī

maiñ na kahtā thā tum se

ḳhauf khātā rahtā huuñ

makr se daġhā se maiñ

aise dost se bhī jo

kashtiyāñ Dubote haiñ

beach meñ samundar ke

maiñ na kahtā thā tum se

pahle soch lo sau baar

bādbāñ ke uThne se

tūfāñ ke beach jaane se

chhoḌ to na jāogī darmiyāñ samundar ke

aur tum ne har ik baar ye yaqīñ dilāyā thā

saath jiine marne kī laakh qasmeñ khaa.ī thiiñ

aur maiñ ki saada dil aa gayā thā bātoñ meñ

āñsuoñ meñ aahoñ meñ

jhuuT kī kathāoñ meñ

jaan kar sabhī kuchh ki

pahle pāñch kashtī meñ chhed kar ke baiThī ho

par tumhārī sūrat jo

tā.eboñ sī lagtī thī

de ga.ī fareb āḳhir

aur phir jo honā thā ho rahā ik din

tum ko chhal hī karnā thā

kaise baaz rahtī tum

sad.hā va.ade kar ke bhī

laakh qasmeñ khā ke bhī

darmiyāñ samundar ke

mauj meñ thapeḌoñ ke

chhed kar ke kashtī meñ

sātveñ maiñ jā baiThī

maiñ na kahtā thā tum se

par nahīñ nahīñ ab to

ab maiñ tum se kahtā huuñ

ishq ik safīna hai

bahr-e-be-karāñ ho yā

pur-ḳhatar samundar ho

paar ḳhud utarnā hai

tum karo ab apnī fikr

kashtiyāñ badalne kī

āThvīñ yā nauvīñ kī

māñjhī DhūñD laane kī

koī makr karne kī

maiñ ki ek sāda-dil

ishq par yaqīñ avval ishq par yaqīñ āḳhir

main na kahta tha tum se rah mein chhoD jaogi

ishq ek riyazat hai kaise Thair paogi

aag ka ye dariya hai kyun kar tair paogi

main na kahta tha tum se

ishq ek ibaadat hai payambari amanat hai

KHaron se ye pur rasta

kab talak chalogi tum

sath chhoD jaogi

main na kahta tha tum se

KHauf khata rahta hun

makr se dagha se main

aise dost se bhi jo

kashtiyan Dubote hain

beach mein samundar ke

main na kahta tha tum se

pahle soch lo sau bar

baadban ke uThne se

tufan ke beach jaane se

chhoD to na jaogi darmiyan samundar ke

aur tum ne har ek bar ye yaqin dilaya tha

sath jine marne ki lakh qasmen khai thin

aur main ki sada dil aa gaya tha baaton mein

aansuon mein aahon mein

jhuT ki kathaon mein

jaan kar sabhi kuchh ki

pahle panch kashti mein chhed kar ke baiThi ho

par tumhaari surat jo

taebon si lagti thi

de gai fareb aaKHir

aur phir jo hona tha ho raha ek din

tum ko chhal hi karna tha

kaise baz rahti tum

sadha wade kar ke bhi

lakh qasmen kha ke bhi

darmiyan samundar ke

mauj mein thapeDon ke

chhed kar ke kashti mein

satwen main ja baiThi

main na kahta tha tum se

par nahin nahin ab to

ab main tum se kahta hun

ishq ek safina hai

bahr-e-be-karan ho ya

pur-KHatar samundar ho

par KHud utarna hai

tum karo ab apni fikr

kashtiyan badalne ki

aaThwin ya nauwin ki

manjhi DhunD lane ki

koi makr karne ki

main ki ek sada-dil

ishq par yaqin awwal ishq par yaqin aaKHir