main nahin hun magar

maiñ nahīñ huuñ magar

ab bhī khilte haiñ khiḌkī ke daa.eñ taraf

phuul bal khaa.ī uljhī huī bel par

zindagī ke kisī faisle kī

ghaḌī se ulajhte hue

maiñ khurachtā rahā thā ye roġhan

jamī hai yahāñ aaj tak

nanhe dhabbe meñ ik

be-kalī mere ehsās kī

aur qālīn par

merī pyālī se chhalkī huī

chaa.e kā ik purānā nishāñ

ab bhī taktā hai maTyālī āñkhoñ se

chhat kī taraf

aaj bhī haiñ paḌī shelf par

jo kitābeñ ḳharīdī thiiñ

maiñ ne bahut pyaar se

aaj bhī haiñ juḌe

kāġhazoñ ke hasīñ ā.īnoñ meñ

mirī sūkhī poroñ se phūTe hue

kaale harfoñ ke chehre ajab shaan se

maiñ to hairān huuñ

mujh se mansūb har ek shai

juuñ kī tuuñ hai to kyā

ek maiñ hī thā jo

ek maiñ hī thā paanī ke

siine pe rakhā huā naqsh jo

pal do pal ko banā aur miT bhī gayā

main nahin hun magar

ab bhi khilte hain khiDki ke daen taraf

phul bal khai uljhi hui bel par

zindagi ke kisi faisle ki

ghaDi se ulajhte hue

main khurachta raha tha ye roghan

jami hai yahan aaj tak

nanhe dhabbe mein ek

be-kali mere ehsas ki

aur qalin par

meri pyali se chhalki hui

chae ka ek purana nishan

ab bhi takta hai maTyali aankhon se

chhat ki taraf

aaj bhi hain paDi shelf par

jo kitaben KHaridi thin

main ne bahut pyar se

aaj bhi hain juDe

kaghazon ke hasin aainon mein

meri sukhi poron se phuTe hue

kale harfon ke chehre ajab shan se

main to hairan hun

mujh se mansub har ek shai

jun ki tun hai to kya

ek main hi tha jo

ek main hi tha pani ke

sine pe rakha hua naqsh jo

pal do pal ko bana aur miT bhi gaya