main nahin to kya

mire liye ye takalluf ye dukh ye hasrat kyuuñ

mirī nigāh-e-talab āḳhirī nigāh na thī

hayāt zār-e-jahāñ kī tavīl rāhoñ meñ

hazār dīda-e-hairāñ fusūñ bikhereñge

hazār chashm-e-tamannā banegī dast-e-savāl

nikal ke ḳhalvat-e-ġham se nazar uThāo to

vahī shafaq hai vahī zau hai maiñ nahīñ to kyā

mire baġhair bhī tum kāmyāb-e-ishrat thiiñ

mire baġhair bhī ābād the nashāt-kade

mire baġhair bhī tum ne diye jalā.e haiñ

mire baġhair bhī dekhā hai zulmatoñ kā nuzūl

mire na hone se ummīd kā ziyāñ kyuuñ ho

baḌhī chalo mai-e-ishrat ke jaam chhalkātī

tumhārī sej tumhāre badan ke phūloñ par

isī bahār kā partav hai maiñ nahīñ to kyā

mire liye ye udāsī ye sog kyuuñ āḳhir

malīh chehre pe gard-e-fasurdagī kaisī

bahār-e-ġhāza se aariz ko tāzgī baḳhsho

aliil āñkhoñ meñ kājal lagāo rañg bharo

siyāh joḌe meñ kaliyoñ kī kahkashāñ gūñdho

hazār hāñpte siine hazār kāñpte lab

tumhārī chashm tavajjoh ke muntazir haiñ abhī

jilau meñ naġhma-o-rañg-o-bahār-o-nūr liye

hayāt garm-e-tag-o-dau hai maiñ nahīñ to kyā

mere liye ye takalluf ye dukh ye hasrat kyun

meri nigah-e-talab aaKHiri nigah na thi

hayat zar-e-jahan ki tawil rahon mein

hazar dida-e-hairan fusun bikherenge

hazar chashm-e-tamanna banegi dast-e-sawal

nikal ke KHalwat-e-gham se nazar uThao to

wahi shafaq hai wahi zau hai main nahin to kya

mere baghair bhi tum kaamyab-e-ishrat thin

mere baghair bhi aabaad the nashat-kade

mere baghair bhi tum ne diye jalae hain

mere baghair bhi dekha hai zulmaton ka nuzul

mere na hone se ummid ka ziyan kyun ho

baDhi chalo mai-e-ishrat ke jam chhalkati

tumhaari sej tumhaare badan ke phulon par

isi bahaar ka partaw hai main nahin to kya

mere liye ye udasi ye sog kyun aaKHir

malih chehre pe gard-e-fasurdagi kaisi

bahaar-e-ghaza se aariz ko tazgi baKHsho

alil aankhon mein kajal lagao rang bharo

siyah joDe mein kaliyon ki kahkashan gundho

hazar hanpte sine hazar kanpte lab

tumhaari chashm tawajjoh ke muntazir hain abhi

jilau mein naghma-o-rang-o-bahaar-o-nur liye

hayat garm-e-tag-o-dau hai main nahin to kya