maine apna wajud gaThDi mein bandh liya

chauthī baar

bañgāl kī gaatī nadiyā ke kināre

vo mujh par munkashif hoī

jahāñ sunahrī machhliyāñ

niile suroñ ko bilotī thiiñ

aur raushnī bāñTte peḌ kalām karte the

us kī sahar phūñktī aañkh ne

mujhe parinda banñe kā hukm diyā

maiñ us ke shāne kī harī shāḳh par baiTh kar

apnā lahn ījād karne lagā

us ke hare badan kā saaya

sivā neze pe thā

maiñ ne us ke badan ke saa.e se

narm bichhaunā taḳhlīq kiyā

aur duniyā ke chehre par thuuk diyā

ek tavīl niiñd ke ba.ad

maiñ ne barahmā kī tarah aañkh kholī

us kā ghanā saaya

mere vajūd par simaT rahā thā

us ke lazīz phaloñ meñ

mere liye kaḌvāhaT reñgne lagī

maiñ ne apnā reza reza vajūd sameT kar

gaThḌī meñ bāñdhā

qutub-numā ko

ḳhalīj bañgāl ke ḳhat par rakh kar

paañv se Thokar maarī

aur havā par paañv rakhtā huā

pāñchveñ samt meñ aage baḌh gayā

maiñ ne apne dil ko yaqīn dilāyā

ki us kī siskiyoñ kā muḳhātab

maiñ nahīñ thā

chauthi bar

bangal ki gati nadiya ke kinare

wo mujh par munkashif hoi

jahan sunahri machhliyan

nile suron ko biloti thin

aur raushni banTte peD kalam karte the

us ki sahar phunkti aankh ne

mujhe parinda banne ka hukm diya

main us ke shane ki hari shaKH par baiTh kar

apna lahn ijad karne laga

us ke hare badan ka saya

siwa neze pe tha

main ne us ke badan ke sae se

narm bichhauna taKHliq kiya

aur duniya ke chehre par thuk diya

ek tawil nind ke baad

main ne barahma ki tarah aankh kholi

us ka ghana saya

mere wajud par simaT raha tha

us ke laziz phalon mein

mere liye kaDwahaT rengne lagi

main ne apna reza reza wajud sameT kar

gaThDi mein bandha

qutub-numa ko

KHalij bangal ke KHat par rakh kar

panw se Thokar mari

aur hawa par panw rakhta hua

panchwen samt mein aage baDh gaya

main ne apne dil ko yaqin dilaya

ki us ki siskiyon ka muKHatab

main nahin tha