maine dekha

maiñ ne dekhā dard kī shiddat se bechain kisī vīrāne kī samt chalā jaatā huuñ

ghane banoñ ke ba.ad khule maidānoñ meñ ret hī ret hai

aur havā meñ ret ke nanhe zarre jagmag jagmag tair rahe haiñ

kuchh aadhe puure peḌ haiñ

haivānī Dhāñche sālim aur adhūre sab chup-chāp haiñ

duur pahāḌī ke pīchhe nuur kā laavā ubal rahā hai

lākhoñ kirnoñ ke tiir fazā meñ tairte phirte haiñ

jo bhī zad meñ aatā hai

us kā joḌ joḌ bikhar jaatā hai

harā-bharā ik peḌ hai

jis ke aadhe hisse kī shāḳheñ phal aur phuul sabhī

phul-jhaḌiyoñ kī tarah sulag sulag kar girte haiñ

yuuñ lagtā hai

jaise kuchh hī der meñ saarī fazā

zar-kār chamakte bujhte zarroñ se bhar jā.egī

saare jism pighal jā.eñge

ek kiran

merī peshānī pe lagī thī

jazb huī

aur jaise kisī ne merā haath pakaḌ kar pīchhe khīñch liyā

suuī kī ik nok chubhī aur TuuT ga.ī

tab se merī rag rag meñ tairtī

andar hī andar mujh ko chhalnī kartī rahtī hai

tab se maiñ ik chīḳhtī chillātī bechain havā huuñ

parbat parbat sar Takrātā huuñ

merā ghar-bār luTā paḌā hai

jis ke TukḌe TukḌe kar ke

mere har vāris ne apnā apnā hissa baañT liyā hai

tab se ye duniyā kitnī chhoTī lagtī hai

maiñ is meñ kaise samā pā.ūñgā

saḳht chaTTāneñ mere bojh se

daldal kī mānind zamīñ meñ dhañs jaatī hai

kaise pā.ūñ dharūñgā

kis se pyaar karūñgā

mere karb ko kaun sahegā

vo haath kahāñ hai

kaisī parchhā.īñ hai

tum ho maiñ huuñ

maiñ to ḳhud bhī apne saath nahīñ

main ne dekha dard ki shiddat se bechain kisi virane ki samt chala jata hun

ghane banon ke baad khule maidanon mein ret hi ret hai

aur hawa mein ret ke nanhe zarre jagmag jagmag tair rahe hain

kuchh aadhe pure peD hain

haiwani Dhanche salim aur adhure sab chup-chap hain

dur pahaDi ke pichhe nur ka lawa ubal raha hai

lakhon kirnon ke tir faza mein tairte phirte hain

jo bhi zad mein aata hai

us ka joD joD bikhar jata hai

hara-bhara ek peD hai

jis ke aadhe hisse ki shaKHen phal aur phul sabhi

phul-jhaDiyon ki tarah sulag sulag kar girte hain

yun lagta hai

jaise kuchh hi der mein sari faza

zar-kar chamakte bujhte zarron se bhar jaegi

sare jism pighal jaenge

ek kiran

meri peshani pe lagi thi

jazb hui

aur jaise kisi ne mera hath pakaD kar pichhe khinch liya

sui ki ek nok chubhi aur TuT gai

tab se meri rag rag mein tairti

andar hi andar mujh ko chhalni karti rahti hai

tab se main ek chiKHti chillati bechain hawa hun

parbat parbat sar Takraata hun

mera ghar-bar luTa paDa hai

jis ke TukDe TukDe kar ke

mere har waris ne apna apna hissa banT liya hai

tab se ye duniya kitni chhoTi lagti hai

main is mein kaise sama paunga

saKHt chaTTanen mere bojh se

daldal ki manind zamin mein dhans jati hai

kaise paun dharunga

kis se pyar karunga

mere karb ko kaun sahega

wo hath kahan hai

kaisi parchhain hai

tum ho main hun

main to KHud bhi apne sath nahin