main shair hun

maiñ shā.ir huuñ mujhe ahl-e-hunar fankār kahte haiñ

mujhe ramz-āshnā-e-nik.hat-e-gulzār kahte haiñ

ḳhulūs-o-uns kā mujh ko alam-bardār kahte haiñ

jo baaqī haiñ mujhe ik banda-e-bekār kahte haiñ

zabūñ-hālī kī zad meñ hai bayāñ merā zabāñ merī

nahīñ minnat-kash-e-tāb-e-shunīdan dāstān merī

jise dekho vahī merī haqīqat se hai begāna

koī be-ḳhud samajhtā hai koī kahtā hai dīvāna

sunā.ūñ kis ko jā kar apnī arzānī kā afsāna

yaqīñ kiije mire haq meñ na mister hai na maulānā

unheñ zid maiñ gulistāñ ko gulistāñ kyuuñ nahīñ kahtā

harīm-e-dahr meñ insāñ ko insāñ kyuuñ nahīñ kahtā

har ik bazm-e-suḳhan meñ go mujhe bulvāyā jaatā hai

jo haiñ be-zauq un ko bhī mujhe sunvāyā jaatā hai

sitam kyā kyā mirī jān-e-hazīñ par Dhāyā jaatā hai

faqat ik paan aur kuchh daad par Tarḳhāyā jaatā hai

mujhe sheroñ ke badle ik nivāla tak nahīñ miltā

jahāñ chhaptā huuñ mujh ko vo risāla tak nahīñ miltā

adā-e-dil vahī aur ḳhū-e-dil-dārī bhī sīkhī hai

barā-e-dostāñ ye tarz-e-ayyārī bhī sīkhī hai

ba-pās-e-ahl-e-majlis nāz-bardārī bhī sīkhī hai

adākārī meñ yaktā huuñ gulū-kārī bhī sīkhī hai

fuzūñ kuchh aur bhī ab rang-e-mahfil karne vaalā huuñ

maiñ apnī shā.irī meñ raqs shāmil karne vaalā huuñ

ḳhudā rakkhe mirī begam ġharīq-e-nukta-chīnī hai

mujassam barhamī nā-vāqif-e-ḳhanda-jabīnī hai

na is kī baat meñ narmī na lab meñ angbīnī hai

ba-faiz-e-shā.irī ghar meñ na ghī hai aur na chīnī hai

tabī.at ab to hai āmāda-e-tark-e-ġhazal-ḳhvānī

che rā kaarī kunad aaqil ki baaz aayad pashemānī

main shair hun mujhe ahl-e-hunar fankar kahte hain

mujhe ramz-ashna-e-nikhat-e-gulzar kahte hain

KHulus-o-uns ka mujh ko alam-bardar kahte hain

jo baqi hain mujhe ek banda-e-bekar kahte hain

zabun-haali ki zad mein hai bayan mera zaban meri

nahin minnat-kash-e-tab-e-shunidan dastan meri

jise dekho wahi meri haqiqat se hai begana

koi be-KHud samajhta hai koi kahta hai diwana

sunaun kis ko ja kar apni arzani ka afsana

yaqin kije mere haq mein na mister hai na maulana

unhen zid main gulistan ko gulistan kyun nahin kahta

harim-e-dahr mein insan ko insan kyun nahin kahta

har ek bazm-e-suKHan mein go mujhe bulwaya jata hai

jo hain be-zauq un ko bhi mujhe sunwaya jata hai

sitam kya kya meri jaan-e-hazin par Dhaya jata hai

faqat ek pan aur kuchh dad par TarKHaya jata hai

mujhe sheron ke badle ek niwala tak nahin milta

jahan chhapta hun mujh ko wo risala tak nahin milta

ada-e-dil wahi aur KHu-e-dil-dari bhi sikhi hai

bara-e-dostan ye tarz-e-ayyari bhi sikhi hai

ba-pas-e-ahl-e-majlis naz-bardari bhi sikhi hai

adakari mein yakta hun gulu-kari bhi sikhi hai

fuzun kuchh aur bhi ab rang-e-mahfil karne wala hun

main apni shairi mein raqs shamil karne wala hun

KHuda rakkhe meri begam ghariq-e-nukta-chini hai

mujassam barhami na-waqif-e-KHanda-jabini hai

na is ki baat mein narmi na lab mein angbini hai

ba-faiz-e-shairi ghar mein na ghi hai aur na chini hai

tabiat ab to hai aamada-e-tark-e-ghazal-KHwani

che ra kari kunad aaqil ki baz aayad pashemani