میں سیتا ہوں

پتی کے ساتھ میں

بنواس میں رہنا مقدر ہے مرا

کوئی راون مری کٹیا میں بھکشک بن کے آئے

دھوکہ دے مجھ کو

اٹھا لے جائے مجھ کو میری دنیا سے

بچھڑ جاؤں میں اپنوں سے

بچا کر دشمنوں سے دھرم بھی

مریادا بھی

زندہ رکھوں خود کو

پرائے دیس میں اپنے پتی کا راستہ دیکھوں

کٹے ہر پل مرا صدیوں کے جیسا

مرے دکھ کو سمجھنے کی کسی کو کیا ضرورت ہے

بھلے میں رام کی پتنی ہوں لیکن ہوں تو عورت ہی

یہ جو سمان ہے اس سے مجھے نیچے اتارو

مجھے اگنی پریکشا سے گزارو