main

tajallī ke shahanshah sun

ḳhamoshī shor kartī thī

maiñ rotī thī

bilaktī thī

ka.ī be-ḳhvāb sī nīñdoñ meñ gum

mātam-kunāñ thī maiñ

samay kī dhūp-chhāñv se pareshāñ thī

magar ab haal kuchh yuuñ hai

mazāq-e-zindagī to ḳhatm ho kar hī nahīñ detā

laboñ par qahqahoñ kī shiddatoñ se ḳhuun risne lag gayā hai

tajallī ke shahanshah sun

ki terī yaad kī hiddat se uktāhaT sī ab mahsūs hotī hai

mohabbat kā gharauñdā nār-e-duniyā ne jalā Daalā

jo darpan thā sunahrī ḳhvāhishoñ kā

ab vahāñ par raakh baaqī hai

tujhe merī ḳhabar kab thī

tujhe merī ḳhabar kyoñ ho

ki tū to jhūTī duniyā hai

vo duniyā jo mujhe mere jahāñ se duur kartī hai

ḳhudā se duur kartī hai

maiñ ulfat ke samundar ke jazīre par huī barbād tanhā huuñ

ye barbādī mirā singhār Thahrī hai

maiñ ab mānūs huuñ is se

maiñ ab koī bhī tabdīlī kabhī bhī sah nahīñ saktī

mujhe barbād rahne de

mujhe ābād mat karnā

maiñ shab-zādī huuñ sadiyoñ se

maiñ apnī zaat kī andher nagrī meñ tajallī DhūñDne meñ mahv huuñ

mere jazīre par kabhī aa kar mujhe āvāz mat denā

bazāhir aañkh se dikhtī chamak se mujh ko nafrat hai

maiñ shab-zādī huuñ sadiyoñ se

tajallī ke shahanshah sun

mujhe āvāz mat denā

tajalli ke shahanshah sun

KHamoshi shor karti thi

main roti thi

bilakti thi

kai be-KHwab si nindon mein gum

matam-kunan thi main

samay ki dhup-chhanw se pareshan thi

magar ab haal kuchh yun hai

mazaq-e-zindagi to KHatm ho kar hi nahin deta

labon par qahqahon ki shiddaton se KHun risne lag gaya hai

tajalli ke shahanshah sun

ki teri yaad ki hiddat se uktahaT si ab mahsus hoti hai

mohabbat ka gharaunda nar-e-duniya ne jala Dala

jo darpan tha sunahri KHwahishon ka

ab wahan par rakh baqi hai

tujhe meri KHabar kab thi

tujhe meri KHabar kyon ho

ki tu to jhuTi duniya hai

wo duniya jo mujhe mere jahan se dur karti hai

KHuda se dur karti hai

main ulfat ke samundar ke jazire par hui barbaad tanha hun

ye barbaadi mera singhaar Thahri hai

main ab manus hun is se

main ab koi bhi tabdili kabhi bhi sah nahin sakti

mujhe barbaad rahne de

mujhe aabaad mat karna

main shab-zadi hun sadiyon se

main apni zat ki andher nagri mein tajalli DhunDne mein mahw hun

mere jazire par kabhi aa kar mujhe aawaz mat dena

bazahir aankh se dikhti chamak se mujh ko nafrat hai

main shab-zadi hun sadiyon se

tajalli ke shahanshah sun

mujhe aawaz mat dena