main tere hijr ka saim

harīm-e-sā'at-e-ruḳhsat meñ

donoñ ne

vuzū āñkhoñ ke zamzam se kiyā thā

aur namāz-e-‘ishq adā kī thī

siyām-e-hijr kī niyyat se

ik duuje se bichhḌe the

tire hālāt se vāqif nahīñ lekin

maiñ tere hijr kā saa.im

baḌī muddat se sahn-e-kā'ba-e-tanhā.ī meñ huuñ

e’tikāf-e-‘ishq kī hālat meñ ehrām-e-vafā bāñdhe

tavāf-e-yād meñ mashġhūl huuñ kab se

ye merī bandagī maqbūl ho jaa.e

agar tū lauT aa.e aur

mujhe bār-e-digar āñkhoñ ke zamzam se bhigo jaa.e

tirī qurbat kī ‘ajvah gar mayassar ho

to phir iftār-e-saum-e-hijr ho jaa.e

harim-e-sa'at-e-ruKHsat mein

donon ne

wuzu aankhon ke zamzam se kiya tha

aur namaz-e-‘ishq ada ki thi

siyam-e-hijr ki niyyat se

ek duje se bichhDe the

tere haalat se waqif nahin lekin

main tere hijr ka saim

baDi muddat se sahn-e-ka'ba-e-tanhai mein hun

e’tikaf-e-‘ishq ki haalat mein ehram-e-wafa bandhe

tawaf-e-yaad mein mashghul hun kab se

ye meri bandagi maqbul ho jae

agar tu lauT aae aur

mujhe bar-e-digar aankhon ke zamzam se bhigo jae

teri qurbat ki ‘ajwah gar mayassar ho

to phir iftar-e-saum-e-hijr ho jae