main tumhaare liye kya kar sakta hun

abdul-karīm

maiñ jab tumhāre māthe par phaile dukhoñ

mehnatī hāthoñ par qismat kī lakīroñ

bhuuk aur bīmārī se khelte tumhāre bachchoñ

vaqt se pahle būḌhī ho jaane vaalī tumhārī auratoñ

qadam qadam par sisaktī izzat-e-nafs

aur phaile hue hāthoñ ko dekhtā huuñ

to merī ragoñ meñ lahū ke ba-jā.e

nafrat bahne lagtī hai

maiñ tumhāre liye kyā kar saktā huuñ abdul-karīm

tumheñ apnī fasl ḳhud kāsht karnī hai

fasl pakne se pahle

apnī darāñtī tez karvā lo

tumheñ kāTnī hai

apnī boī huī fasl

zulm-āmāda haath

aur kalaf lagī gardan

aise vaqtoñ meñ

maiñ tumhāre liye kuchh kar sakūñgā

maiñ karūñgā mazbūt

tumhāre haath aur dil

baḌhā.uñgā tumhārī himmat

aur dikhā.ūñgā tumheñ rasta

na.ī zindagī kā

abdul-karim

main jab tumhaare mathe par phaile dukhon

mehnati hathon par qismat ki lakiron

bhuk aur bimari se khelte tumhaare bachchon

waqt se pahle buDhi ho jaane wali tumhaari auraton

qadam qadam par sisakti izzat-e-nafs

aur phaile hue hathon ko dekhta hun

to meri ragon mein lahu ke ba-jae

nafrat bahne lagti hai

main tumhaare liye kya kar sakta hun abdul-karim

tumhein apni fasl KHud kasht karni hai

fasl pakne se pahle

apni daranti tez karwa lo

tumhein kaTni hai

apni boi hui fasl

zulm-amada hath

aur kalaf lagi gardan

aise waqton mein

main tumhaare liye kuchh kar sakunga

main karunga mazbut

tumhaare hath aur dil

baDhaunga tumhaari himmat

aur dikhaunga tumhein rasta

nai zindagi ka