main wapas aaunga

ġhār-e-hara-e-shā.erī meñ

baiThne jaatā huuñ maiñ

aur maiñ hisār-e-zāt bhī kar ke rakhūñgā

is hisār-e-zāt ke bāhar

koī bhī dāshta shohrat kī

shahr-nau lagā baiThe na apnā

dekhte rahnā

na karnā intizār is kā

ki maiñ taaza sahīfa laane vaalā huuñ

ki har taaza sahīfa

ek din mansūḳh honā hai

use vo ma.anī-o-mafhūm khonā hai

jo asal mudda.ā hai

maiñ vāpas ā.ūñgā

aur maiñ 'kitāb-e-zāt' ik ham-rāh lā.ūñgā

'kitāb-e-zāt' kī har aayat

insānī masā.il kā bayāñ hogī

talāsh-e-hal ke māroñ kī

umīdoñ kā ziyāñ hogī

masā.il jāvedāñ haiñ

zaat kā asal-e-bayāñ haiñ

aur farār un se balā hai

aur yahī ramz-e-talāsh-e-'āñ-ḳhudā' hai

aur talāsh-e-'āñ-ḳhudā' ā.īna-hā-e-zindagī

aur zindagī ġhār-e-hirā hai zāt-e-insāñ kī

isī ġhār-e-hirā meñ jab

mayassar zaat aa.egī

maiñ vāpas ā.ūñgā

aur maiñ 'kitāb-e-zāt' ik ham-rāh lā.ūñgā

koī bhī dāshta shohrat kī

shahr-e-nau lagā baiThe na apnā

dekhte rahnā

ghaar-e-hara-e-shaeri mein

baiThne jata hun main

aur main hisar-e-zat bhi kar ke rakhunga

is hisar-e-zat ke bahar

koi bhi dashta shohrat ki

shahr-nau laga baiThe na apna

dekhte rahna

na karna intizar is ka

ki main taza sahifa lane wala hun

ki har taza sahifa

ek din mansuKH hona hai

use wo mani-o-mafhum khona hai

jo asal muddaa hai

main wapas aaunga

aur main 'kitab-e-zat' ek ham-rah launga

'kitab-e-zat' ki har aayat

insani masail ka bayan hogi

talash-e-hal ke maron ki

umidon ka ziyan hogi

masail jawedan hain

zat ka asal-e-bayan hain

aur farar un se bala hai

aur yahi ramz-e-talash-e-'an-KHuda' hai

aur talash-e-'an-KHuda' aaina-ha-e-zindagi

aur zindagi ghaar-e-hira hai zat-e-insan ki

isi ghaar-e-hira mein jab

mayassar zat aaegi

main wapas aaunga

aur main 'kitab-e-zat' ek ham-rah launga

koi bhi dashta shohrat ki

shahr-e-nau laga baiThe na apna

dekhte rahna